काठमाडौं । राष्ट्रिय स्वतन्त्र पार्टी (रास्वपा)को महिला उपसभापति पदका लागि लिमा अधिकारीको नाम अगाडि आएको छ। प्रतिनिधिसभा सदस्य तथा हाल पार्टी कोषाध्यक्ष रहेकी अधिकारीलाई उक्त पदमा दाबीका रूपमा हेरिएको छ।
पार्टी संरचनाअनुसार केन्द्रीय सदस्यमा निर्वाचित भएपछि मात्र पदाधिकारी पदमा उम्मेदवारी दिन पाइने व्यवस्था भए पनि महिला उपसभापति पदका लागि अधिकारीको नाम महाधिवेशनमा चर्चामा रहेको छ।
महाधिवेशनमार्फत उनलाई सर्वसम्मत रूपमा उपसभापति चयन गर्ने प्रयास भइरहेको स्रोतहरूले जनाएका छन्। पार्टीभित्र संगठन व्यवस्थापन, आर्थिक अनुशासन र नीति निर्माणमा सक्रिय भूमिकाका कारण उनको नाम अघि सारिएको बताइन्छ।
पूर्वउपप्रधानमन्त्री तथा अर्थमन्त्री स्वर्गीय भरतमोहन अधिकारीकी छोरी लिमा अधिकारी रास्वपाको स्थापनाकालदेखि नै संगठन निर्माण र आर्थिक व्यवस्थापनमा सक्रिय रहँदै आएकी छन्। कोषाध्यक्षका रूपमा उनले पार्टीको आर्थिक पारदर्शिता र व्यवस्थापनमा महत्वपूर्ण भूमिका निर्वाह गरेको बताइन्छ।
