काठमाडौं । जर्मनीमाथि २–१ को रोमाञ्चक जित निकाल्दै इक्वेडर फिफा विश्वकप फुटबल प्रतियोगिताको नकआउट चरणमा प्रवेश गरेको छ। अमेरिकाको न्युयोर्क–न्युजर्सी स्टेडियममा भएको खेलमा जर्मनीले सुरुआती अग्रता लिए पनि इक्वेडरले उत्कृष्ट पुनरागमन गर्दै जित हात पारेको हो।
खेलको दोस्रो मिनेटमा लेरोय सानेले जर्मनीलाई अग्रता दिलाएका थिए। तर नवौँ मिनेटमै निल्सन एङ्गुलोले बराबरी गोल फर्काए। दोस्रो हाफको ७७औँ मिनेटमा गोन्जालो प्लाटाले निर्णायक गोल गर्दै इक्वेडरलाई २–१ को जित दिलाए।
यस्तै, समूह ‘इ’को अर्को खेलमा आइभरी कोस्टले कुरासाओलाई २–० ले पराजित गर्दै नकआउट चरणमा स्थान सुरक्षित गर्यो। आइभरी कोस्टका लागि दुवै गोल निकोलस पेपेले सातौँ र ६४औँ मिनेटमा गरे।
समूह चरणको अन्त्यमा जर्मनी ६ अङ्कसहित समूह विजेता बन्दै नकआउटमा पुग्यो। समान ६ अङ्क रहेको आइभरी कोस्ट गोलअन्तरका आधारमा उपविजेता बन्यो। चार अङ्क जोडेको इक्वेडर उत्कृष्ट तेस्रो स्थानमा रहने टोलीमध्ये एक बन्दै अन्तिम १६ मा पुग्न सफल भयो भने एक अङ्कमा सीमित कुरासाओ प्रतियोगिताबाट बाहिरिएको छ।
