काठमाडौँ । प्रतिनिधिसभाको आजको बैठकमा विभिन्न पाँच वटा विधेयक प्रस्तुत हुने भएका छन्। साथै आर्थिक विधेयक, २०८३ पारित गर्ने कार्यसूची समेत रहेको संघीय संसद् सचिवालयले जनाएको छ।
आज दिउँसो १ बजे बस्ने बैठकमा महालेखा परीक्षकको ३९औँ वार्षिक प्रतिवेदन सदनमा पेस गरिनेछ। प्रधानमन्त्रीको तर्फबाट कानून, न्याय तथा संसदीय मामिला मन्त्री सोबिता गौतमले उक्त प्रतिवेदन प्रस्तुत गर्ने कार्यक्रम रहेको छ।
त्यसपछि सार्वजनिक खरिद (दोस्रो संशोधन) विधेयक, २०८३ प्रस्तुत गर्न अनुमति माग्ने प्रस्ताव पनि सोही बैठकमा अघि बढाइनेछ।
अर्थमन्त्री स्वर्णिम वाग्लेले सम्पत्ति शुद्धीकरण (मनि लाउन्डरिङ) निवारण (तेस्रो संशोधन) विधेयक, २०८३ तथा राष्ट्र ऋण उठाउने विधेयक, २०८३ सम्बन्धी प्रस्तावहरू सदनमा पेस गर्ने कार्यसूची छ।
त्यस्तै, भूमि व्यवस्था, सहकारी तथा सङ्घीय मामिला मन्त्री प्रतिभा रावलले सहकारी (पहिलो संशोधन) विधेयक, २०८३ प्रस्तुत गर्नेछिन् भने स्वास्थ्य तथा खाद्य स्वच्छतामन्त्री निशा मेहताले स्वास्थ्य विज्ञान प्रतिष्ठानसम्बन्धी केही नेपाल ऐन संशोधन विधेयक सदनमा पेस गर्नेछिन्।
बैठकमा आर्थिक विधेयक, २०८३ माथि प्राप्त संशोधनमाथि छलफल हुने, संशोधनहरू निर्णयार्थ प्रस्तुत गरिने तथा विधेयक पारित गर्ने प्रक्रिया अघि बढाइनेछ। राष्ट्र ऋण उठाउने विधेयक, २०८३ माथि दफावार छलफल गरी आवश्यक संशोधनपछि पारित गर्ने कार्यसूची समेत रहेको सचिवालयले जनाएको छ।
