काठमाडौं । बागलुङ नगरपालिकाले सामुदायिक तथा छाडा कुकुरको व्यवस्थापनका लागि आवासीय सुविधा सहितको ‘कुकुर होस्टेल’ सञ्चालनमा ल्याएको छ। बजार क्षेत्रमा बढ्दो समस्या समाधान गर्न उद्धार तथा व्यवस्थापन कार्यक्रम सुरु गरिएको नगरपालिकाले जनाएको छ।
नगरपालिका–३ सिम्लेमा पाँच रोपनी सार्वजनिक जग्गामा करिब एक करोड रुपैयाँ लागतमा तारबारसहित आवास र खुला खेलमैदानसहितको संरचना निर्माण गरिएको हो। प्रारम्भिक चरणमा ५० वटा कुकुर राख्न सकिने सुविधायुक्त उक्त होस्टेलमा अहिले २० वटा बेवारिसे, बिरामी र अशक्त कुकुर राखिएको छ।
नगरपालिकाका अनुसार बागलुङबाट ३५ लाख र मुख्यमन्त्री कार्यालयबाट ६५ लाख रुपैयाँ लागत साझेदारीमा संरचना तयार गरिएको हो। कुकुरको हेरचाहका लागि कर्मचारी, खानपान तथा आवश्यक स्वास्थ्य सेवा समेत व्यवस्था गरिएको छ।
नगर प्रमुख वसन्तकुमार श्रेष्ठका अनुसार छाडा कुकुर नियन्त्रणसँगै बन्ध्याकरण, उपचार र दीर्घकालीन व्यवस्थापन कार्यक्रम पनि अघि बढाइएको छ। घरपालुवा कुकुर बिरामी भएपछि सडकमा छोड्ने प्रवृत्तिले दुर्घटना र जनस्वास्थ्यमा समस्या देखिएपछि यस्तो संरचना निर्माण गरिएको उनले बताए।
नगरपालिकाले घरपालुवा कुकुरको दर्ता अनिवार्य गरेको छ, जसअनुसार प्रत्येक दर्ताका लागि २०० रुपैयाँ शुल्क तोकिएको छ। दर्ता प्रणालीमार्फत कुकुरको पहिचान, खोप र औषधि व्यवस्थापन पनि व्यवस्थित गरिने नगरपालिकाले जनाएको छ।
