काठमाडौं । साताको तेस्रो कारोबार दिन बुधबार सेयर बजारमा उच्च वृद्धि देखिएको छ। निरन्तर गिरावटपछि बजारमा पुनः सुधार देखिँदै नेपाल स्टक एक्सचेञ्ज (नेप्से) परिसूचक उल्लेखनीय अंकले बढेर बन्द भएको हो।
नेप्से परिसूचक आज ४४.59 अंकले बढेर २६५२.93 विन्दुमा पुगेको छ, जुन १.70 प्रतिशतको वृद्धि हो। अघिल्लो कारोबार दिन मंगलबार परिसूचक २४.63 अंकले घटेर २६०८.33 विन्दुमा झरेको थियो भने सोमबार पनि १६.54 अंकले गिरावट आएको थियो।
यस दिन कारोबार रकम पनि बढेको छ। मंगलबार ३ अर्ब २५ करोड रुपैयाँको कारोबार भएकोमा बढेर ३ अर्ब ८६ करोड ११ लाख ८३ हजार रुपैयाँ बराबरको कारोबार भएको नेप्सेले जनाएको छ।
आज ३६२ वटा कम्पनीका ९५ लाखभन्दा बढी कित्ता सेयर कारोबार भए। बजारमा अधिकांश स्टकहरूमा हरियाली देखिँदा २५२ कम्पनीको मूल्य बढेको छ भने १७ वटाको घटेको छ। ६ वटा समूहको उपसूचक स्थिर रह्यो। सबै १३ वटै समूहका उपसूचक सकारात्मक देखिएका छन्, जसमा हाइड्रोपावर र ट्रेडिङ समूह करिब २ प्रतिशतले बढेका छन्।
विशेषगरी स्नो रिभर्सको सेयर सकारात्मक सर्किट लेभलमा कारोबार भएको छ। त्यस्तै सीवाईसी नेपाल लघुवित्त वित्तीय संस्थाको सेयर १४.22 प्रतिशत, भुजुङ्ग हाइड्रोपावरको १३.90 प्रतिशत र कुथेली बुखारी स्माल हाइड्रोपावरको ९.73 प्रतिशतले वृद्धि भएको छ।
कारोबार रकमका आधारमा लक्ष्मी सनराइज बैंक शीर्ष स्थानमा रहेको छ, जसको २८ करोड ८४ लाख रुपैयाँ बराबरको कारोबार भएको छ। रिलायन्स स्पिनिङ मिल्सले १७ करोड ५१ लाख, आँखु खोला जलविद्युतले १७ करोड २६ लाख र एनआरएन इन्फ्रास्ट्रक्चर एण्ड डेभलपमेन्टले करिब १६ करोड रुपैयाँको कारोबार गरेका छन्।
