काठमाडौं । प्रहरी सहायक निरीक्षक (असई) थमन विकको हत्या प्रकरणमा उच्च अदालत जनकपुरले पूर्वसांसद लक्ष्मी महतो कोइरी र मधेस प्रदेशसभा सदस्य (निलम्बित) अभिराम शर्मासहित ६ जनालाई पाँच वर्ष कैद सजाय सुनाएको छ।
उच्च अदालत जनकपुरका कामु मुख्यन्यायाधीश टेकनारायण कुँवर र न्यायाधीश मुरारीबाबु श्रेष्ठको संयुक्त इजलासले धर्मेन्द्र राय, रामशङ्कर मिश्र, सुरेश पाण्डे र पवन कापरसहित सबैलाई जनही पाँच वर्ष कैदको सजाय हुने फैसला गरेको हो।
सोही मुद्दामा प्रतिवादीहरू प्रदीप साह माझी, सञ्जयकुमार साह र मोहन ठाकुरलाई भने ज्यानसम्बन्धी कसुरमा जन्मकैदको सजाय तोकिएको अदालतका सूचना अधिकारी गणेश पाण्डेले जानकारी दिए।
यसअघि महोत्तरी जिल्ला अदालतले २०८० मंसिर २८ गते ती तीन जनालाई जन्मकैदको फैसला गरेको थियो भने पूर्वसांसद महतो र पवन कापरलाई सफाइ दिएको थियो। उच्च अदालतले जिल्ला अदालतको फैसला आंशिक रूपमा सदर गर्दै जन्मकैदको सजाय यथावत् राखेको हो।
अदालतका अनुसार घटनाका क्रममा किटानी जाहेरी, अनुसन्धानका क्रममा गरिएको बयान तथा प्रत्यक्ष प्रमाणका आधारमा प्रदीप साह माझी, सञ्जयकुमार साह र मोहन ठाकुरको संलग्नता पुष्टि भएको ठहर गरिएको छ। उपचारका लागि लैजाँदै गर्दा संकलित बयान तथा घटनास्थलका प्रमाणहरूले समेत उनीहरूको भूमिका देखाएको आदेशमा उल्लेख छ।
त्यस्तै, घटनास्थलका तस्बिर र प्रमाणका आधारमा सञ्जयकुमार साहले असई विकमाथि प्रहार गरेको देखिएको अदालतले जनाएको छ।
पूर्वसांसद लक्ष्मी महतो कोइरी, निलम्बित प्रदेशसभा सदस्य अभिराम शर्मा लगायत अन्य केही प्रतिवादीहरूको हकमा प्रत्यक्ष आक्रमणको ठोस प्रमाण नभए पनि जन्मकैद पाएका प्रतिवादीहरूको बयानका आधारमा उनीहरू ज्यान मार्ने कार्यमा संलग्न रहेको निष्कर्ष निकालिएको अदालतको फैसलामा उल्लेख छ।
घटना २०७२ भदौ २५ गते मधेस आन्दोलनका क्रममा भएको हो, जहाँ कार्यस्थलका लागि महोत्तरी आएका असई थमन विकको आन्दोलनकारीको कुटपिटबाट मृत्यु भएको थियो।
