काठमाडौं । युक्रेनको राजधानी किभमा रुसी मिसाइल र ड्रोन आक्रमण हुँदा कम्तीमा ८ जनाको मृत्यु भएको छ भने ३४ जना घाइते भएका छन्।
किभ सैन्य प्रशासनका प्रमुख तिमुर तकाचेन्कोका अनुसार बिहीबार रातिदेखि बिहानसम्म भएको आक्रमणले सहरका करिब तीन दर्जन स्थानलाई निशाना बनाएको थियो। आक्रमणमा आवासीय भवनहरू, उच्च अपार्टमेन्ट कम्प्लेक्स र विभिन्न संरचनामा ठूलो क्षति पुगेको बताइएको छ।
किभका मेयर भित्ताली क्लिच्कोले टेलिग्राममार्फत घाइतेहरूको संख्या ३४ पुगेको जानकारी दिएका छन्। उनका अनुसार एक ९ तले आवासीय भवनमा मानिसहरू फसेका थिए भने एउटा अग्लो भवनको ठूलो भाग क्षतिग्रस्त भएको थियो।
स्थानीय पत्रकारहरूले किभको मध्य र पूर्वी क्षेत्रमा लगातार विस्फोटका आवाज सुनेको बताएका छन्। युक्रेनी वायुसेनाले आक्रमणका क्रममा ब्यालिस्टिक मिसाइलहरू किभतर्फ आइरहेको चेतावनी समेत जारी गरेको थियो।
आक्रमणको समयमा सार्वजनिक भएका तस्बिरहरूमा सर्वसाधारणले भूमिगत मेट्रो स्टेशन तथा अन्य आश्रयस्थलमा शरण लिएको देखिएको छ।
घातक आक्रमणअघि युक्रेनी राष्ट्रपति भोलोदिमिर जेलेन्स्कीले रुसले ठूलो स्तरको सैन्य आक्रमण गर्ने तयारी गरिरहेको चेतावनी दिएका थिए। उनले अन्तर्राष्ट्रिय भ्रमण छोट्याएर स्वदेश फर्कने घोषणा गर्दै नागरिकहरूलाई हवाई साइरन बज्दा सतर्क रहन र सुरक्षित स्थानमा बस्न आग्रह गरेका थिए।
जेलेन्स्कीले रुसले लामो समयदेखि युक्रेनमाथि ठूलो आक्रमणको योजना बनाइरहेको दाबी गर्दै शान्ति वार्ताका प्रयासहरू असफल भएको आरोप पनि लगाएका छन्।
यसैबीच, आक्रमणको प्रभाव क्षेत्रका कारण छिमेकी देश पोल्यान्डले सुरक्षाका लागि केही समय लडाकु विमानहरू परिचालन गरेको थियो। पछि कुनै हवाई उल्लंघन नभएको पुष्टि भएपछि ती विमानहरू फिर्ता बोलाइएको जनाइएको छ।
