काठमाडौं । देशभर सक्रिय रहेको मनसुन प्रणालीका कारण आज पनि अधिकांश क्षेत्रमा वर्षाको सम्भावना रहेको जल तथा मौसम पूर्वानुमान महाशाखाले जनाएको छ। मनसुन वायुको प्रभाव कायम रहेकाले देशभर सामान्यदेखि पूर्ण बदली रहने अपेक्षा गरिएको छ। हाल बागमती, कोशी र लुम्बिनी प्रदेशका विभिन्न स्थानमा मेघगर्जन र चट्याङसहित मध्यम वर्षा भइरहेको छ भने अन्य प्रदेशमा पनि मौसम सामान्यतया बदली रहेको छ।
महाशाखाका अनुसार आज दिउँसो देशका पहाडी तथा हिमाली क्षेत्रका केही स्थानमा मेघगर्जन, चट्याङसहित मध्यम वर्षा हुने सम्भावना छ। उच्च हिमाली भू–भागका केही स्थानमा हल्का हिमपात हुन सक्ने अनुमान गरिएको छ। तराई क्षेत्रका केही स्थानमा पनि मेघगर्जन र चट्याङसहित वर्षा हुने सम्भावना रहेकाले आवश्यक सतर्कता अपनाउन आग्रह गरिएको छ।
आज राति पनि मनसुनको प्रभाव निरन्तर रहनेछ। देशभर सामान्यदेखि पूर्ण बदली रहनेछ भने कोशी, बागमती, गण्डकी, कर्णाली, लुम्बिनी र सुदूरपश्चिम प्रदेशका हिमाली क्षेत्रका केही स्थानमा मध्यम वर्षासँगै हिमपात हुन सक्ने सम्भावना रहेको छ। साथै, पहाडी र तराई क्षेत्रका केही स्थानमा मेघगर्जन र चट्याङसहित वर्षा हुने अनुमान गरिएको छ।
महाशाखाले विशेषगरी कोशी, बागमती, गण्डकी र लुम्बिनी प्रदेशका पहाडी तथा तराई क्षेत्रका एक–दुई स्थानमा भारी वर्षा हुन सक्ने भएकाले नदी तथा खोलानाला आसपासका बासिन्दा, यात्रु तथा सडक प्रयोगकर्तालाई विशेष सावधानी अपनाउन आग्रह गरेको छ। पहिरो, डुबान तथा आकस्मिक बाढीको जोखिम रहने भएकाले मौसमको पछिल्लो अद्यावधिक जानकारीअनुसार यात्रा तथा दैनिक गतिविधि सञ्चालन गर्न पनि अनुरोध गरिएको छ।
