काठमाडौं । कीर्तिपुरस्थित राधास्वामी सत्संग होल्डिङ सेन्टरमा रहेका भूमिहीन सुकुमवासी तथा अव्यवस्थित बसोबासी परिवारले सरकारले घोषणा गरेको राहत रकमका लागि निवेदन नदिने भएका छन् ।
नेपाल सरकार र अधिकार सम्पन्न बागमती सभ्यता एकीकृत विकास समितिले प्रभावित परिवारलाई असार २२ गतेभित्र राहतका लागि आवेदन दिन आग्रह गरेपछि उनीहरूले राहतभन्दा पनि दीर्घकालीन पुनर्स्थापनाको व्यवस्था गर्न माग गरेका हुन् ।
संयुक्त विज्ञप्ति जारी गर्दै प्रभावित परिवारले होल्डिङ सेन्टरमा बसिरहेका करिब आधा परिवारले राहतका लागि आवेदन नदिएको र आगामी दिनमा पनि नदिने निर्णय गरेको जानकारी दिएका छन् ।
उनीहरूले आफ्नो मुख्य आवश्यकता आर्थिक सहायता नभई राज्यले हटाएको बासस्थानको सम्मानजनक व्यवस्थापन रहेको बताएका छन् । वैकल्पिक आवासको व्यवस्था नगरी घर भत्काएर केही रकम उपलब्ध गराउनु समस्याको स्थायी समाधान नभएको उनीहरूको भनाइ छ ।
“हामीलाई राहत होइन, राज्यले भत्काएको हाम्रो बासको सम्मानजनक व्यवस्थापन चाहिएको हो,” विज्ञप्तिमा उल्लेख गरिएको छ ।
प्रभावित परिवारले राहतका लागि आवेदन नदिएको कारण देखाएर कुनै पनि किसिमको दबाब, धम्की, अधिकारबाट वञ्चित गर्ने वा भविष्यमा सरकारी सेवा–सुविधाबाट रोक्ने प्रयास स्वीकार्य नहुने चेतावनीसमेत दिएका छन् ।
