काठमाडौं । पूर्वाधार विकास मन्त्रालयले तोकिएको समयभित्र इजाजतपत्र नवीकरण नगर्ने ४४ वटा निर्माण व्यवसायी फर्म तथा कम्पनीको इजाजतपत्र खारेज गरेको छ।
निर्माण व्यवसाय ऐन, २०५५ अनुसार प्रत्येक आर्थिक वर्ष निर्माण व्यवसायीले आफ्नो इजाजतपत्र अनिवार्य रूपमा नवीकरण गर्नुपर्ने व्यवस्था छ। आर्थिक वर्ष २०८२/८३ का लागि नवीकरण गर्ने अन्तिम म्याद २०८२ साल चैत मसान्तसम्म तोकिएको थियो।
तर, तोकिएको अवधिभित्र नवीकरण प्रक्रिया पूरा नगरेका कम्पनीहरूको इजाजतपत्र ऐनको व्यवस्थाअनुसार स्वतः खारेज भएको मन्त्रालयले जनाएको छ।
खारेज गरिएका कम्पनीहरूमा ‘क’ वर्गदेखि ‘घ’ वर्गसम्मका निर्माण व्यवसायी फर्म तथा कम्पनीहरू रहेका छन्।
