काठमाडौं। बजारमा रहेको अधिक तरलता व्यवस्थापन गर्न नेपाल राष्ट्र बैंकले ६० अर्ब रुपैयाँ बराबरको निक्षेप सङ्कलन गर्ने भएको छ। केन्द्रीय बैंकले १९ दिन अवधिको निक्षेप सङ्कलन उपकरणमार्फत उक्त रकम उठाउन लागेको हो।
राष्ट्र बैंकको मौद्रिक व्यवस्थापन विभागले शुक्रबार जारी गरेको सूचनाअनुसार निक्षेप सङ्कलन उपकरणका लागि बोलकबोल आह्वान गरिएको छ। बोलकबोल प्रक्रिया अनलाइन बिडिङ सिस्टम सफ्टवेयर (ओबीएसएस) मार्फत शुक्रबार दिउँसो ३ बजेसम्म सञ्चालन हुनेछ।
राष्ट्र बैंकले जारी गर्ने उक्त उपकरणको साँवा तथा ब्याज आगामी असोज २३ गते भुक्तानी गरिने जनाएको छ। निक्षेपको ब्याजदर भने बोलकबोल प्रक्रियाबाट निर्धारण हुनेछ।
सूचनाअनुसार बोलकबोलमा सहभागी संस्थाले न्यूनतम १० करोड रुपैयाँदेखि आवेदन दिन सक्नेछन्। आवेदन रकम कुल आह्वान गरिएको रकमको सीमाभित्र ५ करोड रुपैयाँले भाग गर्दा निःशेष भाग जाने गरी पेश गर्नुपर्नेछ।
निक्षेप सङ्कलन उपकरणमा राष्ट्र बैंकबाट इजाजत प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाले मात्रै सहभागिता जनाउन पाउनेछन्।
बजारमा अत्यधिक तरलता हुँदा त्यसलाई व्यवस्थापन गर्न राष्ट्र बैंकले समय–समयमा निक्षेप सङ्कलन उपकरण प्रयोग गर्दै आएको छ। यस प्रक्रियामार्फत बैंक तथा वित्तीय संस्थाबाट रकम संकलन गरी बजारमा रहेको तरलता सन्तुलनमा राख्ने केन्द्रीय बैंकको उद्देश्य हुन्छ।
