काठमाडौं । देशका विभिन्न छ वटा स्वास्थ्य विज्ञान प्रतिष्ठानमा नियुक्त भएका नयाँ उपकुलपतिहरूले पद तथा गोपनीयताको शपथ लिएका छन्। स्वास्थ्य तथा खाद्य स्वच्छता मन्त्री निशा मेहतासमक्ष उनीहरूले औपचारिक रूपमा शपथ ग्रहण गरेका हुन्।
शपथ लिने उपकुलपतिहरूमा चिकित्सा विज्ञान राष्ट्रिय प्रतिष्ठानका डा. विवेक आचार्य, पाटन स्वास्थ्य विज्ञान प्रतिष्ठानका डा. नवीस मानसिंह प्रधान र बीपी कोइराला स्वास्थ्य विज्ञान प्रतिष्ठानका डा. स्मृति कार्की रहेका छन्।
त्यस्तै, पोखरा स्वास्थ्य विज्ञान प्रतिष्ठानका लागि नियुक्त डा. नारायणसिंह गुरुङ, कर्णाली स्वास्थ्य विज्ञान प्रतिष्ठानका डा. सूर्यमान मेन्याङबो तथा राप्ती स्वास्थ्य विज्ञान प्रतिष्ठानका डा. अजय कुमार मिश्रले पनि पदभार सम्हाल्नुअघि शपथ लिएका छन्।
सरकारले ‘स्वास्थ्य विज्ञान प्रतिष्ठानहरूको उपकुलपति छनोट तथा सिफारिस सम्बन्धी एकीकृत कार्यविधि, २०८३’ अनुसार गठन गरिएको छनोट तथा सिफारिस समितिको सिफारिसका आधारमा उनीहरूलाई उपकुलपति पदमा नियुक्त गरेको हो।
नयाँ कार्यविधिअनुसार भएको नियुक्तिसँगै सम्बन्धित स्वास्थ्य विज्ञान प्रतिष्ठानहरूमा शैक्षिक तथा प्रशासनिक नेतृत्वले पूर्णता पाएको छ। अब नवनियुक्त उपकुलपतिहरूले आ–आफ्ना प्रतिष्ठानको शैक्षिक गुणस्तर सुधार, संस्थागत व्यवस्थापन र सेवा विस्तारमा नेतृत्वदायी भूमिका निर्वाह गर्ने अपेक्षा गरिएको छ।
