काठमाडौँ । आत्मदाह प्रयास गरेका मुगुको सोरु गाउँपालिका–१ का २५ वर्षीय गणेश नेपालीको निधन भएको छ।
वीर अस्पतालमा उपचाररत नेपालीको केहीबेरअघि उपचारका क्रममा निधन भएको हो। गम्भीर अवस्थामा अस्पताल भर्ना गरिएका उनको स्वास्थ्य अवस्था पछिल्लो समय अत्यन्तै नाजुक बन्दै गएको चिकित्सकहरूले बताएका थिए।
यसअघि वीर अस्पतालले पत्रकार सम्मेलन गर्दै नेपालीको स्वास्थ्य अवस्था अत्यन्तै अस्थिर रहेको र जुनसुकै समयमा थप जटिलता आउन सक्ने जानकारी दिएको थियो। चिकित्सकहरूले उनको अवस्था गम्भीर रहेको, उपचारका क्रममा पनि जोखिम कायम रहेको र स्वास्थ्य अवस्थाबारे निश्चित पूर्वानुमान गर्न कठिन रहेको बताएका थिए।
अन्ततः चिकित्सकहरूको निरन्तर प्रयासका बाबजुद नेपालीलाई बचाउन नसकिएको अस्पतालले जनाएको छ।
