काठमाडौं । जल तथा मौसम विज्ञान विभाग, मौसम पूर्वानुमान महाशाखाका अनुसार देशभर मनसुनी वायु सक्रिय रहेकाले आज विभिन्न प्रदेशमा हल्कादेखि भारी तथा केही स्थानमा धेरै भारी वर्षाको सम्भावना रहेको छ। मनसुनको न्यून चापीय रेखा औसत स्थानभन्दा केही उत्तरतर्फ, नेपालको तराई क्षेत्र नजिक अवस्थित रहेको विभागले जनाएको छ।
कोशी प्रदेश
आज दिनभर अधिकांश स्थानमा बदली रहनेछ। पहाडी र तराईका धेरै स्थानमा मेघगर्जन तथा चट्याङसहित मध्यम वर्षाको सम्भावना छ भने हिमाली क्षेत्रमा वर्षा तथा हिमपात हुन सक्छ। पहाडी भू–भागका केही स्थान र तराईका एक–दुई स्थानमा भारी वर्षा हुने सम्भावना रहेको छ। रातिको समयमा वर्षा थप सक्रिय भई पहाडी र तराईका केही स्थानमा भारीदेखि धेरै भारी तथा एक–दुई स्थानमा अति भारी वर्षासमेत हुन सक्ने विभागको अनुमान छ।
मधेस प्रदेश
मधेसमा आज अधिकांश स्थानमा बदली रहनेछ। धेरै स्थानमा मेघगर्जन र चट्याङसहित मध्यम वर्षा हुने सम्भावना छ। दिउँसो केही स्थानमा भारी वर्षा हुन सक्नेछ भने राति पनि वर्षाको क्रम जारी रहनेछ। थोरै स्थानमा भारीदेखि धेरै भारी वर्षाको सम्भावना रहेकाले सतर्कता अपनाउन आग्रह गरिएको छ।
बागमती प्रदेश
बागमती प्रदेशमा आज अधिकांश स्थानमा बदली रहनेछ। पहाडी र तराईका धेरै स्थानमा मेघगर्जन तथा चट्याङसहित मध्यम वर्षा हुने सम्भावना छ। हिमाली क्षेत्रमा वर्षा तथा हिमपात हुन सक्छ। पहाडी भू–भागका केही स्थान र तराईका एक–दुई स्थानमा भारी वर्षा हुने सम्भावना रहेको छ। राति वर्षा थप तीव्र भई केही स्थानमा भारीदेखि धेरै भारी तथा पहाडी क्षेत्रका एक–दुई स्थानमा अति भारी वर्षा हुन सक्नेछ।
गण्डकी प्रदेश
गण्डकी प्रदेशमा अधिकांश स्थानमा बदली रहनेछ। पहाडी र तराईका धेरै स्थानमा मेघगर्जनसहित मध्यम वर्षा हुने सम्भावना छ भने हिमाली क्षेत्रमा वर्षा तथा हिमपात हुन सक्छ। दिउँसो पहाडी क्षेत्रका केही स्थानमा भारी वर्षाको सम्भावना छ। रातिको समयमा पनि पहाडी तथा तराईका एक–दुई स्थानमा भारी वर्षा हुन सक्ने अनुमान गरिएको छ।
लुम्बिनी प्रदेश
लुम्बिनीमा आज अधिकांश स्थानमा बदली रहनेछ। पहाडी र तराईका केही स्थानमा मेघगर्जन तथा चट्याङसहित मध्यम वर्षा हुने सम्भावना छ। हिमाली क्षेत्रमा हल्का वर्षा वा हिमपात हुन सक्छ। रातिको समयमा पनि केही स्थानमा वर्षा जारी रहनेछ र पहाडी तथा तराईका एक–दुई स्थानमा भारी वर्षा हुन सक्नेछ।
कर्णाली प्रदेश
कर्णालीमा सामान्यदेखि आंशिक बदली रहनेछ। पहाडी क्षेत्रका केही स्थानमा तथा हिमाली भू–भागका थोरै स्थानमा मेघगर्जनसहित मध्यम वर्षा वा हिमपात हुने सम्भावना रहेको छ। रातिको समयमा पनि यस्तै मौसम रहने विभागको अनुमान छ।
सुदूरपश्चिम प्रदेश
सुदूरपश्चिममा सामान्यतया बदली रहनेछ। पहाडी र तराईका थोरै स्थानमा मेघगर्जन तथा चट्याङसहित मध्यम वर्षा हुन सक्छ भने हिमाली क्षेत्रमा हल्का वर्षा वा हिमपातको सम्भावना रहेको छ। रातिको समयमा पनि केही स्थानमा वर्षा जारी रहने अनुमान गरिएको छ।
विभागको चेतावनी
मनसुन सक्रिय रहेकाले विशेषगरी कोशी, बागमती, मधेस र गण्डकी प्रदेशका केही क्षेत्रमा भारीदेखि अति भारी वर्षा हुन सक्ने सम्भावना छ। यसका कारण नदी तथा खोलामा पानीको बहाव बढ्ने, बाढी, पहिरो, डुबान र भू–क्षयको जोखिम रहने भएकाले आवश्यक सतर्कता अपनाउन विभागले आग्रह गरेको छ। साथै वर्षाका कारण कृषि, स्वास्थ्य सेवा, पर्यटन, पर्वतारोहण तथा सडक र हवाई यातायातमा समेत प्रभाव पर्न सक्ने जनाइएको छ।
