काठमाडौं। संघीय संसदअन्तर्गत प्रतिनिधिसभाका तीन र राष्ट्रियसभाको एक गरी चारवटा संसदीय समितिको बैठक आज बस्ने भएको छ। बैठकहरूमा विकास आयोजना, विधेयक, मानव अधिकार तथा मधेश प्रदेशको स्थलगत अनुगमन प्रतिवेदनलगायत विषयमा छलफल हुने कार्यसूची तय गरिएको छ।
अर्थ समिति
प्रतिनिधिसभाअन्तर्गतको अर्थ समितिको बैठक बिहान ८:३० बजे बस्नेछ। बैठकमा राष्ट्रिय योजना आयोगसँग आर्थिक वर्ष २०८२/८३ मा सम्पन्न भएका प्रमुख कामकारबाही, १६औँ आवधिक योजनाको कार्यान्वयन अवस्था, मध्यकालीन खर्च संरचनाको प्रगति तथा राष्ट्रिय प्राथमिकता प्राप्त आयोजना र अन्य विकास आयोजनाको प्रगतिबारे छलफल गरिनेछ।
शिक्षा, स्वास्थ्य तथा सूचना प्रविधि समिति
यस समितिको बैठक दिउँसो १ बजे बस्नेछ। बैठकमा राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१ माथि दफावार छलफल हुने कार्यसूची रहेको छ।
छलफलमा विज्ञान, प्रविधि तथा नवप्रवर्तन मन्त्री, सम्बन्धित मन्त्रालयका सचिव, कानुन, न्याय तथा संसदीय मामिला मन्त्रालयका सचिव, राष्ट्रिय विधि विज्ञान प्रयोगशालाका कार्यकारी निर्देशक तथा विषय विज्ञ डा. गोपालकुमार चौधरी सहभागी हुनेछन्।
कानुन, न्याय तथा मानव अधिकार समिति
यो समितिको बैठक पनि दिउँसो १ बजे बस्नेछ। बैठकमा बाल सुधार गृहमा रहेका बालबालिकाको मानव अधिकार अवस्थाबारे निरीक्षण तथा अनुगमन उपसमितिले तयार पारेको प्रतिवेदनमाथि छलफल गर्ने कार्यसूची रहेको छ।
संघीयता सबलीकरण तथा राष्ट्रिय सरोकार समिति
राष्ट्रियसभाअन्तर्गतको संघीयता सबलीकरण तथा राष्ट्रिय सरोकार समितिको बैठक बिहान ११:३० बजे बस्नेछ। बैठकमा मधेश प्रदेशमा गरिएको स्थलगत अनुगमनको प्रतिवेदनको मस्यौदा माथि छलफल गरिने कार्यक्रम तय गरिएको छ।
