काठमाडौं । थाइल्यान्डको राजधानी बैंककस्थित एक मनोरञ्जनस्थलमा भएको भीषण आगलागीमा कम्तीमा २७ जनाको मृत्यु भएको छ भने ६३ जना घाइते भएका छन्। बैंककको चातुचक जिल्लामा रहेको रोङ बियर ना लाट फ्राओ नामक बारमा सोमबार मध्यरातपछि आगलागी भएको हो।
आगलागीपछि बारको मुख्य प्रवेशद्वार आगोले अवरुद्ध हुँदा भित्र रहेका ग्राहकहरूलाई बाहिर निस्कन कठिन भएको थियो। उद्धारकर्मीहरूले करिब आधा घण्टाको प्रयासपछि आगो नियन्त्रणमा लिएका थिए। धेरैजसो पीडितहरू धुवाँबाट जोगिन भवनको पछाडिको भाग र शौचालयतर्फ पुगे पनि बाहिर निस्कन नसकेको अधिकारीहरूले बताएका छन्।
थाइल्यान्डका प्रधानमन्त्री अनुटिन चार्नविराकुलले घटनामा २७ जनाको मृत्यु भएको पुष्टि गर्दै घाइतेहरूको विभिन्न अस्पतालमा उपचार भइरहेको जानकारी दिएका छन्। उनले आगलागीको कारणबारे अनुसन्धान भइरहेको बताए। स्थानीय विवरणअनुसार मृतकमध्ये नौ जना पुरुष र १८ जना महिला रहेका छन् भने केही व्यक्ति अझै सम्पर्कविहीन रहेको जनाइएको छ।
प्रत्यक्षदर्शीका अनुसार आगलागी सुरु हुँदा कार्यक्रममा प्रस्तुति दिइरहेका एक संगीतकर्मीले विद्युत् सर्किट ब्रेकर नजिक समस्या देखिएको बताएका थिए। त्यसपछि केही क्षणमै विस्फोटजस्तो आवाज आएको र धुवाँ तथा आगो तीव्र रूपमा फैलिएको बताइएको छ।
बैंककका गभर्नर चात्चार्ट सित्तिपुन्तले प्रारम्भिक अनुसन्धानका आधारमा बारभित्र प्रयोग गरिएका ज्वलनशील सजावट सामग्रीका कारण आगो तीव्र गतिमा फैलिएको हुन सक्ने बताएका छन्। यद्यपि घटनाको वास्तविक कारण भने विस्तृत अनुसन्धानपछि मात्र खुल्ने अधिकारीहरूले जनाएका छन्।
