काठमाडौं। देशका विभिन्न क्षेत्रमा परेको अविरल वर्षा र बाढीका कारण प्रमुख राजमार्ग तथा सडक खण्डमा यातायात प्रभावित भएको छ। नेपाल प्रहरीले सोमबार बिहान ६:३० बजेसम्म सार्वजनिक गरेको विवरणअनुसार कोशी, बागमती, गण्डकी र लुम्बिनी प्रदेशका विभिन्न स्थानमा बाढी र पहिरोका कारण सडक अवरुद्ध भएका हुन्।
कोशी प्रदेशअन्तर्गत भोजपुर नगरपालिका–५ बोखिमस्थित मध्यपहाडी लोकमार्गमा असार १२ गते आएको बाढीका कारण सडक प्रभावित भएको थियो। हाल उक्त सडक खण्ड एकतर्फी रूपमा सञ्चालनमा रहेको छ भने यात्रुको सहजताका लागि वैकल्पिक मार्गसमेत प्रयोग भइरहेको प्रहरीले जनाएको छ।
त्यस्तै, इलाम नगरपालिका–९ राजदुवालीस्थित मेची राजमार्ग असार २३ गतेदेखि परेको निरन्तर वर्षाका कारण पूर्ण रूपमा अवरुद्ध भएको छ। उक्त क्षेत्रमा पनि वैकल्पिक बाटोमार्फत यातायात सञ्चालन भइरहेको विवरणमा उल्लेख छ।
प्रहरीका अनुसार वर्षा जारी रहेकाले थप सडक अवरोध हुन सक्ने सम्भावना रहेको छ। यात्रु तथा सवारी चालकलाई सडकको अवस्था बुझेर मात्र यात्रा गर्न र जोखिमयुक्त क्षेत्रमा सावधानी अपनाउन आग्रह गरिएको छ।
