काठमाडौँ । त्रिपुरेश्वरमा आत्मदाह गरेका गणेश नेपालीको घटनाबारे अनुसन्धान गर्न उनका परिवारले प्रहरीमा जाहेरी दिएका छन्। गणेशका दाजु मदन नेपालीले प्रहरी वृत्त कालीमाटीमा दिएको जाहेरी दर्ता भएको जिल्ला प्रहरी परिसर काठमाडौँका एक अधिकारीले जानकारी दिएका छन्।
पीडित परिवार र सरकारबीच शव बुझ्ने, पोस्टमार्टमलगायत कानुनी प्रक्रियामा सहयोग गर्ने विषयमा ९ बुँदे सहमति भएको थियो। जाहेरी दर्तापछि प्रहरीले शव परीक्षणका लागि त्रिवि शिक्षण अस्पताललाई पत्राचार गरेको छ। गणेशको शव हाल शिक्षण अस्पतालमै राखिएको छ।
मुगुको सोरु गाउँपालिका–१ का ३५ वर्षीय गणेशले असार २५ गते त्रिपुरेश्वरमा आफ्नै शरीरमा आगो लगाएका थिए। महानगर प्रहरीले उनको मोटरसाइकलमा ह्विल लक गरेपछि उनले आत्मदाह गरेको बताइएको छ। उनको उपचारका क्रममा असार २६ गते वीर अस्पतालमा मृत्यु भएको थियो।
