काठमाडौं । वैदेशिक रोजगार विभागले अनुमति नलिई भारतीय विमानस्थल प्रयोग गरेर नेपाली श्रमिक विदेश पठाउने तथा विभागले माग गरेको विवरण उपलब्ध नगराउने ५९३ वटा वैदेशिक रोजगार व्यवसायी संस्थामाथि कारबाही प्रक्रिया अघि बढाएको छ।
विभागका अनुसार स्वीकृति नलिई भारतका विमानस्थल प्रयोग गरी श्रमिक पठाउने १५९ वटा म्यानपावर कम्पनीलाई पहिलो पटक सचेत गराइएको छ। यस्तै, विभागले माग गरेको उडान विवरण तथा आवश्यक कागजात नबुझाउने ४३४ वटा कम्पनीलाई पनि विवरण पेस गर्न निर्देशन दिँदै सचेत गराइएको छ।
पटक–पटक नियम उल्लंघन गर्ने आठ वटा म्यानपावर कम्पनीलाई भने जनही ५० हजार रुपैयाँ जरिबाना गरिएको विभागले जनाएको छ। विभागका अनुसार भारतबाट अनुमति बिना श्रमिक पठाउने तीन कम्पनी र माग गरिएको विवरण नबुझाउने पाँच कम्पनीलाई जरिबाना गरिएको हो।
विभागले श्रम स्वीकृति लिएर विदेश गएका नेपाली श्रमिकको उडान विवरण माग गरेको थियो। सञ्चालनमा रहेका १ हजार ११७ इजाजत प्राप्त वैदेशिक रोजगार व्यवसायी संस्थामध्ये ६७८ वटाले मात्र विवरण उपलब्ध गराएका थिए। विवरण अध्ययनका क्रममा १५९ वटा कम्पनीले विभागको स्वीकृति बिना विदेशी विमानस्थल प्रयोग गरी श्रमिक पठाएको पाइएको विभागले जनाएको छ।
वैदेशिक रोजगार ऐन, २०६४ को दफा २२ अनुसार वैदेशिक रोजगारीमा जाने श्रमिकले स्वदेशी विमानस्थल प्रयोग गर्नुपर्ने व्यवस्था छ। उक्त व्यवस्था उल्लंघन गरेको भन्दै विभागले सम्बन्धित कम्पनीलाई ऐनअनुसार कारबाही प्रक्रिया अघि बढाएको हो।
यसैबीच, नेपाल वैदेशिक रोजगार व्यवसायी संघले विभागको कारबाही प्रक्रियामाथि पुनरावलोकन गर्न माग गरेको छ। संघका अध्यक्ष डिकबहादुर खत्रीले सरोकारवाला निकायसँग समन्वय गरेर समस्या समाधान गर्नुपर्ने बताएका छन्।
