काठमाडौं । साताको पहिलो कारोबार दिन सोमबार नेपाली सेयर बजार परिसूचक नेप्से ८ महिनायताकै न्यून विन्दुमा झरेको छ। यस दिन नेप्से ३० दशमलव ६० अंकले घटेर २ हजार ५७० दशमलव ६० अंकमा कायम भएको हो।
यो स्तर नेप्सेको गत मंसिर ४ गतेयताकै न्यून विन्दु हो। त्यस दिन नेप्से २ हजार ५६० अंकमा थियो।
बजारमा गिरावट आए पनि कारोबार रकम भने बढेको छ। सोमबार ७ अर्ब ४६ करोड रुपैयाँ बराबरको सेयर कारोबार भएको छ। अघिल्लो कारोबार दिन कारोबार रकम ६ अर्ब ८६ करोड रुपैयाँ रहेको थियो।
सोमबार २२ कम्पनीको सेयर मूल्य बढ्दा २४९ कम्पनीको घटेको छ भने ४ कम्पनीको मूल्य स्थिर रह्यो। सबै समूहगत सूचक ओरालो लागेका छन्।
व्यापार समूह सबैभन्दा धेरै २ दशमलव ३० प्रतिशतले घटेको छ। यस्तै होटल तथा पर्यटन, जलविद्युत्, उत्पादन तथा प्रशोधन, फाइनान्सलगायत अधिकांश समूहमा गिरावट आएको छ।
यस दिन सामुदायिक लघुवित्त र आत्मनिर्भर लघुवित्तको सेयर मूल्य बढेको छ भने उपकार लघुवित्तको मूल्य सबैभन्दा धेरै घटेको छ। कारोबार रकमका आधारमा ऋणपत्र अगाडि रहेको बजारले देखाएको छ।
