काठमाडौं । नेपाल दूरसञ्चार कम्पनी लिमिटेड (नेपाल टेलिकम) की तत्कालीन प्रबन्धनिर्देशक संगीता पहाडी अर्याल पुनः सोही पदमा बहाल भएकी छन्।
विशेष अदालतबाट आफूमाथि लागेको आरोपमा पूर्ण सफाइ पाएपछि नेपाल सरकार, सञ्चार तथा सूचना प्रविधि मन्त्रालयको असार २६ गतेको मन्त्रीस्तरीय निर्णयअनुसार उनको निलम्बन फुकुवा गर्दै पुनर्बहाली गरिएको हो।
पदबहालीपछि आयोजित कार्यक्रममा प्रबन्धनिर्देशक अर्यालले कर्मचारीहरूलाई संस्था र राष्ट्रको हितलाई प्राथमिकतामा राखेर निष्ठापूर्वक काम गर्न आग्रह गरिन्। उनले कर्मचारीहरूमाथि विगतमा लागेका आरोप तथा उत्पन्न भ्रमहरू अन्ततः सत्यको जीतसँगै समाप्त भएको उल्लेख गर्दै आफ्नो अनुपस्थितिमा संस्थाको नेतृत्व सम्हाल्ने सम्पूर्ण टोलीप्रति धन्यवाद व्यक्त गरिन्।
अर्यालले नेपाल टेलिकममा प्रक्रियागत सुधारलाई प्राथमिकता दिँदै आगामी दिनमा आन्तरिक व्यवस्थापनलाई प्रभावकारी बनाउनुका साथै बाह्य सरोकारवालाको अपेक्षालाई समेत सम्बोधन गर्ने प्रतिबद्धता व्यक्त गरिन्।
उनले नेपाल सरकारको नीति तथा मार्गनिर्देशनअनुसार सत्यनिष्ठ, पारदर्शी र जिम्मेवार ढंगले काम गर्दै नेपाल टेलिकमप्रतिको जनविश्वास, बजार साख र सेवा गुणस्तरलाई थप मजबुत बनाउने बताइन्।
नेपाल टेलिकमले पनि गुणस्तरीय दूरसञ्चार सेवा प्रवाह, कानुनी शासनको सम्मान तथा देशको दूरसञ्चार क्षेत्रको अग्रणी संस्थाका रूपमा आफ्नो भूमिकालाई अझ प्रभावकारी बनाउने प्रतिबद्धता जनाएको छ।
