काठमाडौं । लामो समयदेखि बन्द रहेको हेटौँडा कपडा उद्योग पुनः सञ्चालन गर्ने सरकारी तयारीले गति लिएको छ। सरकारले उद्योगलाई दीर्घकालीन रूपमा सञ्चालन गर्ने योजनासहित प्रारम्भिक चरणमा परीक्षण उत्पादन सुरु गर्ने तयारी अघि बढाएको हो।
उद्योग, वाणिज्य तथा आपूर्ति मन्त्रालयद्वारा गठित अध्ययन कार्यदलले उद्योग पुनः सञ्चालनसम्बन्धी प्रतिवेदन सोमबार उद्योग, वाणिज्य तथा आपूर्तिमन्त्री गौरीकुमारी यादवलाई बुझाएको छ।
मन्त्रालयको प्रशासन तथा संस्थान महाशाखाका प्रमुख रामबन्धु सुवेदीको संयोजकत्वमा गठित कार्यदलले उद्योग पुनः सञ्चालनका लागि हालसम्म भएका प्रगति, चालिएका कदम र आगामी कार्ययोजनासहितको प्रतिवेदन तयार पारेको हो।
मन्त्रालयका अनुसार उद्योगको परीक्षण सञ्चालनका लागि आवश्यक तयारी यसअघि नै सुरु भइसकेको छ। अर्थ मन्त्रालयबाट विनियोजित बजेटका आधारमा नेपाली सेनाले उद्योगमा रहेका मेसिनको मर्मत तथा परीक्षण उत्पादनको तयारी अघि बढाइरहेको छ।
प्रतिवेदनअनुसार सरकारको निर्देशनबमोजिम नेपाली सेनाले आगामी दुई महिनाभित्र हेटौँडा कपडा उद्योगबाट परीक्षण उत्पादन सुरु गर्ने लक्ष्य राखेको छ। सोही समयसीमालाई ध्यानमा राख्दै उद्योग परिसरमा आवश्यक तयारी तीव्र पारिएको छ।
उद्योग मन्त्रालयको प्रस्तावपछि अर्थ मन्त्रालयले असारको पहिलो साता नेपाली सेनाको सैनिक सामग्री उत्पादन निर्देशनालयको खातामा ३३ लाख रुपैयाँ बजेट निकासा गरिसकेको छ। उक्त रकम परीक्षण उत्पादनका लागि आवश्यक प्रारम्भिक काममा प्रयोग भइरहेको प्रतिवेदनमा उल्लेख छ।
उद्योग सञ्चालनको जिम्मेवारी पाएपछि नेपाली सेनाको प्राविधिक टोली उद्योग परिसरमा परिचालन भएको छ। टोलीले उद्योगको सरसफाइ, आवश्यक कच्चा पदार्थ व्यवस्थापन तथा मेसिन मर्मतको काम अघि बढाएको मन्त्रालयले जनाएको छ।
यसैगरी, उद्योगको भौतिक संरचना तथा पूर्वाधार मर्मतका लागि पूर्वाधार विकास मन्त्रालयबाट ५० लाख रुपैयाँको लागत अनुमान पेस गरिएको छ। सोही आधारमा उद्योगका भवन तथा अन्य संरचना मर्मत गर्ने तयारी भइरहेको छ।
उद्योगभित्रको विद्युत् प्रणाली मर्मतको जिम्मेवारी हेटौँडा औद्योगिक क्षेत्र व्यवस्थापन कार्यालयले लिएको छ। आवश्यक विद्युत् मर्मत कार्य सम्पन्न भइसकेको प्रतिवेदनमा उल्लेख गरिएको छ।
सरकारले तत्कालका लागि उद्योगमा रहेका पुराना मेसिन मर्मत गरी परीक्षण उत्पादन गर्ने योजना बनाएको छ। परीक्षण उत्पादनको परिणामका आधारमा उद्योगलाई पूर्ण क्षमतामा सञ्चालन गर्न विस्तृत परियोजना प्रतिवेदन (डीपीआर) तयार गरिनेछ।
डीपीआरका आधारमा आवश्यक कानुनी तथा नीतिगत निर्णय गर्दै हेटौँडा कपडा उद्योगलाई दीर्घकालीन रूपमा सञ्चालन गर्ने योजना अघि बढाइने प्रतिवेदनमा उल्लेख छ।
प्रतिवेदन बुझ्दै मन्त्री गौरीकुमारी यादवले राष्ट्रिय गौरवसँग जोडिएको हेटौँडा कपडा उद्योग पुनः सञ्चालनलाई सरकारले उच्च प्राथमिकतामा राखेको बताइन्। उनले कार्यदलका सुझावअनुसार निर्धारित समयभित्र परीक्षण उत्पादन सुरु गर्न मन्त्रालयले आवश्यक समन्वय र सहयोग गर्ने प्रतिबद्धता व्यक्त गरिन्।
