काठमाडौं। एसीसी यू–१९ महिला प्रिमियर कपमा नेपालले लगातार तेस्रो जित निकाल्दै क्वाटरफाइनलमा स्थान बनाएको छ। समूह ‘डी’ अन्तर्गत मंगलबार भएको खेलमा नेपालले हङकङलाई १८१ रनले पराजित गरेको हो।
वायुमास क्रिकेट ओभलमा टस हारेर पहिले ब्याटिङ गरेको नेपालले निर्धारित २० ओभरमा ६ विकेट गुमाउँदै २११ रन बनाएको थियो। जवाफी ब्याटिङमा आएको हङकङले २० ओभरमा ९ विकेट गुमाएर मात्र ३० रन बनाउन सक्यो।
नेपालका लागि कप्तान सोनी पाख्रिनले उत्कृष्ट ब्याटिङ गर्दै ९० रन बनाइन्। उनले ६० बलमा १३ चौका र एक छक्का प्रहार गरिन्। ओपनर सावित्री धामीले ५२ रनको अर्धशतकीय पारी खेल्दा एलिसा कुमारी यादवले २३ रन जोडिन्।
बलिङतर्फ सोनी पाख्रिनले ४ विकेट लिइन्। मनिषा उपाध्यायले २ विकेट तथा कृष्मा गुरुङ र स्नेह महराले समान १/१ विकेट लिए।
हङकङका लागि वोङ विङ क्यू हेलीले सर्वाधिक १३ रन बनाइन् भने अन्य कुनै पनि ब्याटरले दोहोरो अंकको स्कोर बनाउन सकेनन्।
नेपालले प्रतियोगिताको पहिलो खेलमा कतार र दोस्रो खेलमा सिङ्गापुरलाई पराजित गरेको थियो। लगातार तीन जितसँगै नेपाल समूह चरणबाटै क्वाटरफाइनलमा पुगेको हो।
