काठमाडौं। अमेरिकी राष्ट्रपति डोनाल्ड ट्रम्पले हर्मुज जलडमरु हुँदै आवतजावत गर्ने जहाजमाथि शुल्क लगाउने आफ्नो घोषणाबाट पछि हटेका छन्। निर्णय सार्वजनिक भएको केही समयमै उनले इरानमाथि थप दबाब दिने संकेत गर्दै वार्तामा आउन आग्रह गरेका छन्।
अन्तर्राष्ट्रिय सञ्चारमाध्यमका अनुसार ट्रम्पले इरानले वार्ताको बाटो नअपनाएमा त्यसविरुद्ध कडा कदम चाल्न सकिने चेतावनी दिएका छन्। उनले इरानका ऊर्जा तथा पूर्वाधार क्षेत्रलाई लक्षित गर्ने सम्भावनाबारे समेत अभिव्यक्ति दिएको जनाइएको छ।
हर्मुज जलडमरु विश्वको महत्वपूर्ण ऊर्जा आपूर्ति मार्गमध्ये एक हो। यही समुद्री मार्ग हुँदै विश्व बजारमा ठूलो मात्रामा कच्चा तेल र तरलीकृत प्राकृतिक ग्यास (एलएनजी) आपूर्ति हुने भएकाले यहाँ हुने कुनै पनि तनावले अन्तर्राष्ट्रिय ऊर्जा बजारमा असर पार्न सक्छ।
इरान र पश्चिमी मुलुकहरूबीचको पछिल्लो तनावका कारण क्षेत्रीय सुरक्षा, ऊर्जा आपूर्ति र विश्व अर्थतन्त्रमा पर्ने प्रभावबारे अन्तर्राष्ट्रिय समुदायले चासो व्यक्त गर्दै आएको छ।
