काठमाडौं। नक्कली भुटानी शरणार्थी प्रकरणमा काठमाडौं जिल्ला अदालतले दोषी ठहर भएका प्रतिवादीहरूको सजाय निर्धारण गरेको छ। अदालतको फैसलाअनुसार पूर्वउपप्रधानमन्त्री टोपबहादुर रायमाझीसहित १४ जनालाई विभिन्न अवधिको कैद तथा जरिमाना तोकिएको छ।
अदालतले पूर्वउपप्रधानमन्त्री तथा पूर्वगृहमन्त्री टोपबहादुर रायमाझीलाई ४ वर्ष कैद र ४० हजार रुपैयाँ जरिमाना सुनाएको छ। त्यस्तै, पूर्वगृहमन्त्री बालकृष्ण खाँणलाई २ वर्ष कैद र २० हजार रुपैयाँ जरिमाना तोकिएको छ।
भुटानी मानवअधिकारकर्मी टेकनाथ रिजाललाई पनि २ वर्ष कैद र २० हजार रुपैयाँ जरिमाना हुने फैसला भएको छ। पूर्वगृहसचिव टेकनारायण पाण्डेसहित अन्य केही प्रतिवादीलाई ४ वर्ष कैद र जरिमाना तोकिएको छ भने केहीलाई १ वर्ष कैद तथा जरिमाना सुनाइएको छ।
काठमाडौं जिल्ला अदालतले असार २४ गते रायमाझी, खाँण, पाण्डे, रिजाललगायतलाई विभिन्न अभियोगमा दोषी ठहर गरेको थियो। न्यायाधीश तेजबहादुर खड्काको इजलासले संगठित अपराध, ठगी तथा राज्यविरुद्धको कसुरसम्बन्धी अभियोगमा संलग्नताको आधारमा फैसला गरेको हो।
अदालतले केही प्रतिवादीलाई राज्यविरुद्धको कसुरमा मतियारका रूपमा संलग्न भएको ठहर गरेको छ। यस प्रकरणमा मुद्दा चलाइएका केही व्यक्तिले भने सफाइ पाएका छन्।
सफाइ पाउनेमा रामशरण केसी, टंककुमार गुरुङ, सन्दीप रायमाझी, प्रतीक थापा, लक्ष्मी महर्जन, केशव तुलाधर र आशिष बुढाथोकी रहेका छन्।
कसलाई कति सजाय?
| प्रतिवादीको नाम | सजाय |
|---|---|
| टोपबहादुर रायमाझी | ४ वर्ष कैद, ४० हजार रुपैयाँ जरिमाना |
| बालकृष्ण खाँण | २ वर्ष कैद, २० हजार रुपैयाँ जरिमाना |
| टेकनाथ रिजाल | २ वर्ष कैद, २० हजार रुपैयाँ जरिमाना |
| टेकनारायण पाण्डे | ४ वर्ष कैद, ४० हजार रुपैयाँ जरिमाना |
| केशवप्रसाद दुलाल | ४ वर्ष कैद, ४० हजार रुपैयाँ जरिमाना |
| सानु भण्डारी | ४ वर्ष कैद, ४० हजार रुपैयाँ जरिमाना |
| सागर राई | ४ वर्ष कैद, ४० हजार रुपैयाँ जरिमाना |
| सन्देश शर्मा | ४ वर्ष कैद, ४० हजार रुपैयाँ जरिमाना |
| डा. इन्द्रजीत राई | ४ वर्ष कैद, ४० हजार रुपैयाँ जरिमाना |
| गोविन्दकुमार चौधरी | ४ वर्ष कैद, ४० हजार रुपैयाँ जरिमाना |
| नरेन्द्र केसी | १ वर्ष कैद, १० हजार रुपैयाँ जरिमाना |
| शमशेर मियाँ | १ वर्ष कैद, १० हजार रुपैयाँ जरिमाना |
| हरिभक्त महर्जन | १ वर्ष कैद, १० हजार रुपैयाँ जरिमाना |
| निरञ्जनकुमार खरेल | १ वर्ष कैद, १० हजार रुपैयाँ जरिमाना |
Category: राष्ट्रिय समाचार / न्याय तथा अपराध
