काठमाडौं । बागमती प्रदेश सरकारमा सहभागी नेकपा एमालेका ६ जना मन्त्रीले सोमबार सामूहिक राजीनामा दिने भएका छन्। एमालेले नेपाली कांग्रेस नेतृत्वको सरकारलाई दिएको समर्थन फिर्ता लिने निर्णय गरेसँगै मन्त्रीहरूले मुख्यमन्त्री इन्द्रबहादुर बानियाँसमक्ष राजीनामा बुझाउन लागेका हुन्।
समर्थन फिर्ता र मन्त्रीहरूको राजीनामाबारे औपचारिक निर्णय गर्न एमाले बागमती प्रदेश संसदीय दलको बैठक सोमबार काठमाडौंमा बसिरहेको छ। यसअघि शनिबार नै मुख्यमन्त्री बानियाँलाई समर्थन फिर्ता लिने निर्णयबारे जानकारी गराइएको थियो।
बागमती सरकारमा एमालेबाट कृषि, पशुपन्छी तथा वन वातावरण मन्त्री मधुसूदन पौडेल, भौतिक पूर्वाधार विकास मन्त्री डा. दिनेशचन्द्र देवकोटा, उद्योग, पर्यटन, श्रम तथा यातायात मन्त्री बिन्दु श्रेष्ठ तथा जयराम थापा, भरतबहादुर केसी र किरण थापा मन्त्री छन्।
एमालेको निर्णयसँगै बागमती प्रदेशको सत्ता समीकरणमा फेरबदल आउने देखिएको छ।
