काठमाडौं । सुनसरीको देवानगञ्ज गाउँपालिका–३, कप्तानगन्जमा आइतबार राति दुई समुदायबीच भएको झडपका क्रममा प्रहरीको गोली लागेर एक जनाको मृत्यु भएको छ। घटनापछि उत्पन्न तनावलाई नियन्त्रणमा लिन स्थानीय प्रशासनले जिल्लाको दक्षिण क्षेत्रका पाँच प्रमुख बजारमा अर्को सूचना जारी नभएसम्मका लागि कर्फ्यु आदेश लागू गरेको छ।
जिल्ला प्रहरी कार्यालय सुनसरीका अनुसार बोलबम पर्वका अवसरमा हिन्दू धर्मावलम्बीहरू कोशी ब्यारेजबाट जल लिएर डिजे बजाउँदै कप्तानगन्ज चोकतर्फ जाँदै गर्दा डिजेको आवाजलाई लिएर अर्को समुदायका केही व्यक्तिले विरोध जनाएका थिए। यही विवाद पछि झडपमा परिणत भएको प्रहरीले जनाएको छ।
स्थिति नियन्त्रणमा लिन प्रहरी निरीक्षक प्रकाशकुमार श्रेष्ठको नेतृत्वमा प्रहरी टोली घटनास्थल पुगेको थियो। प्रारम्भिक रूपमा दुवै पक्षलाई सम्झाउने प्रयास गरिए पनि अवस्था थप तनावग्रस्त बनेपछि प्रहरीले गोली चलाएको प्रहरीको भनाइ छ।
प्रहरीका अनुसार गोली लागेर घाइते भएका देवानगञ्ज गाउँपालिका–४ का ३० वर्षीय ओमप्रकाश मेहताको उपचारका लागि विराटनगर लैजाने क्रममा मृत्यु भएको हो।
झडपमा नेपाल प्रहरीका प्रहरी निरीक्षक राकेश राईसहित आठ जना प्रहरी घाइते भएका छन्। प्रहरी निरीक्षक राईको टाउकोमा पाँच टाँका लगाइएको छ भने अन्य घाइते प्रहरीको अवस्था सामान्य रहेको जनाइएको छ। सशस्त्र प्रहरीतर्फ पनि पाँच जना घाइते भएका छन्।
दुई समूहबीचको झडपका क्रममा कप्तानगन्ज बजारका घर, मेडिकल, सवारीसाधन तथा अन्य संरचनामा तोडफोड र आगजनी भएको प्रहरीले जनाएको छ।
घटनापछि सुरक्षा अवस्थालाई मध्यनजर गर्दै सुनसरीका प्रमुख जिल्ला अधिकारी बासुदेव घिमिरेले सोमबार बिहान ७ बजेदेखि अर्को सूचना जारी नभएसम्म जिल्लाको दक्षिण क्षेत्रका पाँच प्रमुख बजारमा कर्फ्यु आदेश जारी गरेका छन्। कर्फ्यु अवधिभर सर्वसाधारणको आवतजावत, भेला, जुलुस तथा कुनै पनि प्रकारका सभा–सम्मेलन गर्न निषेध गरिएको प्रशासनले जनाएको छ।
