काठमाडौं। साउन महिनाको दोस्रो सोमबार देशभरका शिवालयमा श्रद्धालु भक्तजनको चहलपहल बढेको छ। बिहानैदेखि पशुपतिनाथ मन्दिरसहित विभिन्न शिवालयमा दर्शन गर्ने भक्तजनको भीड लागेको छ।
पशुपति क्षेत्र विकास कोषका अनुसार पशुपतिनाथ मन्दिरका चारै ढोका बिहान ३ बजेदेखि नै दर्शनार्थीका लागि खुला गरिएको थियो। साउन सोमबारको अवसरमा आउने भक्तजनको सहज, सुरक्षित र व्यवस्थित दर्शन तथा विशेष पूजाका लागि आवश्यक व्यवस्थापन मिलाइएको कोषले जनाएको छ।
पहिलो सोमबारको तुलनामा दोस्रो सोमबार पशुपति क्षेत्रमा थप व्यवस्थापन गरिएको छ। दर्शन व्यवस्थापनलाई प्रभावकारी बनाउन पशुपति क्षेत्र विकास कोषका पदाधिकारी तथा कर्मचारीसँगै मन्दिर पहरा गण, नेपाल प्रहरी, सशस्त्र प्रहरी बल, नेपाली सेना, ट्राफिक प्रहरी, काठमाडौं महानगर प्रहरी तथा विभिन्न धार्मिक र सामाजिक संघसंस्थाका प्रतिनिधि परिचालन गरिएको छ।
कोषका सदस्यसचिव तीर्थ श्रेष्ठले साउन सोमबार पशुपतिनाथ दर्शनका लागि आउने ठूलो संख्याका भक्तजनलाई सहज, सुरक्षित र व्यवस्थित वातावरणमा पूजाआराधना गर्ने व्यवस्था मिलाइएको जानकारी दिए।
कोषका अनुसार मन्दिरका चारवटै ढोका बिहान ३ बजेदेखि बेलुका आरतीपछि ८ बजेसम्म खुला रहनेछन्। विशेष पूजा भने बिहान ८ः३० बजेदेखि मध्याह्न १२ बजेसम्म सञ्चालन हुनेछ।
दर्शनार्थीको व्यवस्थापनका लागि मन्दिर प्रवेशमा चार वटा लामको व्यवस्था गरिएको छ। बिहानैदेखि भक्तजनको उपस्थिति बढे पनि लामो समय कुर्नुपर्ने अवस्था नरहेको कोषले जनाएको छ। पशुपति क्षेत्रमा दर्शनार्थीको सुविधाका लागि प्राथमिक उपचारलगायत आवश्यक सेवाको व्यवस्था समेत गरिएको छ।
