काठमाडौ । संसदीय सुनुवाइ समितिको बैठक आज बस्दैछ। बिहानका लागि तय गरिएको बैठकमा निर्वाचन आयोगका निर्वाचन आयुक्तका लागि प्रस्तावित गुरुप्रसाद वाग्ले (ओखलढुङ्गा) र डा. राजीव सुब्बा (काठमाडौं) को संसदीय सुनुवाइ गर्ने कार्यसूची रहेको छ।
संवैधानिक परिषद्को गत असार १९ गते बसेको बैठकले प्रमुख निर्वाचन आयुक्तमा मानबहादुर कार्की र निर्वाचन आयुक्तमा गुरुप्रसाद वाग्ले तथा डा. राजीव सुब्बाको नाम सिफारिस गरेको थियो।
संवैधानिक व्यवस्था अनुसार संसदीय सुनुवाइ समितिबाट अनुमोदन भएपछि प्रमुख निर्वाचन आयुक्त तथा निर्वाचन आयुक्तलाई राष्ट्रपतिले नियुक्त गर्ने व्यवस्था रहेको छ।
यसअघि समितिले प्रस्तावित पदाधिकारीहरूविरुद्ध उजुरी तथा सुझाव आह्वान गरेको थियो। आजको सुनुवाइपछि समितिले आफ्नो निर्णय सार्वजनिक गर्ने अपेक्षा गरिएको छ।
