काठमाडौं। वीरगञ्जस्थित नारायणी अस्पतालका ६८ जना चिकित्सकले सामूहिक राजीनामा दिएका छन्। अस्पतालका चिकित्सकमाथि भएको आक्रमण र वार्ताका क्रममा प्रशासनबाट भएको दुर्व्यवहारको विरोध गर्दै उनीहरूले मेडिकल सुपरिन्टेन्डेन्ट डा. चित्तरञ्जन साहसमक्ष राजीनामा बुझाएका हुन्।
गत साउन ८ गते अस्पतालका चिकित्सक डा. प्रमोद राममाथि भएको आक्रमण तथा अस्पताल परिसरमा भएको तोडफोडपछि चिकित्सकहरूले आकस्मिकबाहेकका सेवा बन्द गरेर आन्दोलन गर्दै आएका थिए।
अस्पतालका प्रवक्ता डा. उदयनारायण सिंहका अनुसार स्वास्थ्य मन्त्रालयको आग्रहमा समस्या समाधानका लागि जिल्ला प्रशासन कार्यालय पर्सामा वार्तामा सहभागी हुन पुगेका चिकित्सकहरूमाथि दुर्व्यवहार भएको थियो। उनका अनुसार प्रमुख जिल्ला अधिकारी र प्रहरी प्रमुखबाट अपशब्द प्रयोग हुनुका साथै चिकित्सकहरूलाई करिब एक घण्टा नियन्त्रणमा राखिएको थियो।
प्रशासनबाट भएको व्यवहारपछि सुरक्षित र सम्मानजनक रूपमा काम गर्ने वातावरण नरहेको निष्कर्ष निकाल्दै चिकित्सकहरूले सामूहिक राजीनामाको निर्णय लिएको जनाइएको छ।
यसै घटनाको विरोधमा नेपाल चिकित्सक सङ्घले पनि मंगलबार देशभरका स्वास्थ्य संस्थामा आकस्मिकबाहेकका सेवा बन्द गर्ने घोषणा गरेको छ। सङ्घले चिकित्सकको सुरक्षा र कार्यस्थलको वातावरण सुनिश्चित गर्न माग गरेको छ।
