काठमाडौं । सुनसरी घटनापछि उत्पन्न परिस्थितिबारे छलफल गर्न सत्तारुढ दल राष्ट्रिय स्वतन्त्र पार्टी (रास्वपा) का सभापति रवि लामिछानेले आह्वान गरेको सर्वदलीय बैठक सिंहदरबारमा सुरु भएको छ।
बैठकमा नेपाली कांग्रेसका सभापति गगन थापा, नेकपा (एमाले) का महासचिव शंकर पोखरेल, नेकपाका संयोजक पुष्पकमल दाहाल ‘प्रचण्ड’, रास्वपाका उपसभापति तथा अर्थमन्त्री स्वर्णिम वाग्ले, राष्ट्रिय प्रजातन्त्र पार्टीका अध्यक्ष राजेन्द्र लिङ्देन, जनमत पार्टीका अध्यक्ष सिके राउतसहित मधेस केन्द्रित दलका नेता तथा सांसदहरूको सहभागिता रहेको छ।
सुनसरी घटनापछि विकसित राजनीतिक तथा सामाजिक परिस्थितिको समीक्षा गर्दै शान्ति–सुरक्षा, सामाजिक सद्भाव र राजनीतिक दलहरूको साझा धारणा निर्माणका विषयमा बैठकमा छलफल भइरहेको जनाइएको छ।
सुनसरी घटनापछि उत्पन्न तनावलाई सम्बोधन गर्दै सबै राजनीतिक दलबाट संयम र एकताको सन्देश प्रवाह गर्ने उद्देश्यले सर्वदलीय बैठक आयोजना गरिएको हो।
