काठमाडौं । अविरल वर्षापछि आएको बाढी र पहिरोका कारण देशका विभिन्न मुख्य राजमार्ग तथा सडक खण्डहरू अवरुद्ध भएका छन्। नेपाल प्रहरीले सार्वजनिक गरेको पछिल्लो विवरणअनुसार आज देशभरका आठ वटा प्रमुख सडक पूर्णरूपमा बन्द भएका छन्, जसका कारण ती मार्गमा सवारी आवागमन प्रभावित भएको छ।
प्रहरीका अनुसार मेची राजमार्ग, बी.पी. राजमार्ग, मध्य पहाडी लोकमार्ग, कालीगण्डकी कोरिडोर, पृथ्वी राजमार्ग तथा अरनिको राजमार्गअन्तर्गतका विभिन्न सडक खण्डमा बाढी र पहिरोका कारण यातायात सञ्चालन हुन सकेको छैन।
मेची राजमार्गअन्तर्गत इलामको राजदुवाली क्षेत्रमा सडक अवरुद्ध भएको छ। त्यसैगरी पृथ्वी राजमार्गअन्तर्गत चितवनको इच्छाकामना गाउँपालिका–५ मा पहिरो खसेपछि सवारी आवागमन ठप्प बनेको छ।
यसैगरी बी.पी. राजमार्गअन्तर्गत ललितपुरको बागमती गाउँपालिका–३ स्थित पाण्डुर–मकवानपुरको ठिंगन खण्ड तथा काभ्रेको खुर्कोट–नेपालथोक–कटुन्जेबेँसी सडक खण्ड पनि पूर्ण रूपमा अवरुद्ध रहेको प्रहरीले जनाएको छ।
मध्य पहाडी लोकमार्गअन्तर्गत पूर्वी रुकुमको भूमे गाउँपालिका क्षेत्रमा पनि सडक अवरुद्ध भएको छ। यस्तै कर्णाली प्रदेशका विभिन्न सडकमा बाढी र पहिरोका कारण यातायात सेवा प्रभावित भएको छ। भेरी कोरिडोर (रुकुम पश्चिम), मुगुको नाग्म–गमगढी सडक तथा जुम्लाको नाग्म सडक खण्डमा सवारी आवागमन पूर्ण रूपमा बन्द रहेको नेपाल प्रहरीले जनाएको छ।
प्रहरीले वर्षा निरन्तर भइरहेकाले पहिरो र बाढीको जोखिम अझै कायम रहेको भन्दै अत्यावश्यकबाहेकका यात्रा गर्दा सम्बन्धित निकायबाट सडकको अवस्थाबारे जानकारी लिएर मात्रै यात्रा गर्न सर्वसाधारणलाई आग्रह गरेको छ।
