काठमाडौं। अमेरिकी राष्ट्रपति डोनाल्ड ट्रम्पलाई इरानबाट हत्याको विश्वसनीय धम्की आएपछि गत महिना टर्कीबाट गोप्य रूपमा सानो सैन्य विमानमार्फत बेलायत लगिएको खुलासा भएको छ।
वासिङ्टन पोस्टका अनुसार जुलाई ८ मा अङ्काराबाट प्रस्थान गर्दा ट्रम्पले पुरानो ‘एयर फोर्स वन’ मा चढेको देखाइएको थियो। तर केही मिनेटमै उनलाई विमानबाट निकालेर विमानस्थलको खानपान सामग्री बोक्ने ट्रकमार्फत सानो सी–३२ए विमानमा पुर्याइएको थियो। सो विमानबाट ट्रम्प बेलायत पुगेका थिए।
ट्रम्प पुरानो विमानमै रहेको विश्वासमा सञ्चारमाध्यमका प्रतिनिधि र केही अधिकारीलाई राखिएको थियो। पत्रकारहरूलाई विमानका झ्यालका पर्दा बन्द गर्नसमेत भनिएको थियो। बेलायत पुगेपछि भने ट्रम्प पुनः पुरानो एयर फोर्स वनबाट सार्वजनिक रूपमा बाहिरिएका थिए।
सुरक्षा खतराका कारण ट्रम्पले कतारले उपहार दिएको नयाँ बोइङ ७४७–८ विमानमा टर्कीबाट फर्कनुको सट्टा पुरानो विमान प्रयोग गरेको बताइएको थियो। नयाँ विमानको सुरक्षा क्षमताबारे यसअघि नै प्रश्न उठ्दै आएको थियो।
ह्वाइट हाउसले घटनाबारे सुरक्षाको आवश्यकताअनुसार उच्चस्तरीय सुरक्षा प्रोटोकल अपनाइएको बताउँदै राष्ट्रपतिको सुरक्षाका लागि उपलब्ध सबै साधन प्रयोग भइरहेको जनाएको छ।
ट्रम्पलाई सी–३२ए विमानबाट पुरानो एयर फोर्स वनमा बेलायतमा कसरी पुनः स्थानान्तरण गरिएको थियो भन्ने विवरण भने अझै स्पष्ट छैन।
