काठमाडौं । नेपाल अटोमोबाइल इम्पोर्टर्स एन्ड म्यानिफ्याक्चरर्स एसोसिएसन (नाइमा)को आयोजनामा दोस्रो संस्करणको नाइमा नेपाल मोबिलिटी एक्स्पो–२०२६ आजदेखि भृकुटीमण्डपमा सुरु भएको छ।
एक्स्पोको उद्घाटन प्रहरी महानिरीक्षक दानबहादुर कार्कीले गरेका हुन्। साउन ३१ गतेसम्म सञ्चालन हुने एक्स्पोमा ५५ भन्दा बढी अटोमोबाइल ब्रान्डको सहभागिता रहेको छ भने ४० भन्दा बढी नयाँ मोडल तथा उत्पादन सार्वजनिक गरिने आयोजकले जनाएको छ।
एक्स्पोमा दुईपांग्रे तथा चारपांग्रे सवारीसाधनसँगै कमर्सियल भेहिकल, विद्युतीय तथा हाइब्रिड मोबिलिटी समाधान, नयाँ प्रविधि, सेवा र अन्य मोबिलिटीसम्बन्धी उत्पादन प्रदर्शनमा राखिएका छन्।
भृकुटीमण्डपस्थित प्रदर्शनी हलमा ५१ भन्दा बढी स्टल निर्माण गरिएको छ। एक्स्पोमा हुन्डाई, बीवाईडी, निसान, टाटा, टोयोटा, किया र महिन्द्रालगायत प्रमुख अटोमोबाइल ब्रान्ड सहभागी छन्।
आयोजकका अनुसार यस वर्षको एक्स्पो गत वर्षको तुलनामा थप भव्य र प्रविधिमैत्री बनाइएको छ।
