काठमाडौं। चीनको स्वशासित क्षेत्र तिब्बतबाट आएको बाढीसँगै भोटेकोशी नदीमा आएको अकल्पनीय बाढीका कारण त्रिशूली र नारायणी नदीमा हालसम्म ६४ शव तथा मानव शरीरका विभिन्न अङ्ग फेला परेका छन्। नदीमा आएको बाढीले बगाएर ल्याएका शवहरू चितवनका विभिन्न क्षेत्रमा भेटिएका हुन्। कतिपय शव सग्लो अवस्थामा छन् भने केही स्थानमा मानव शरीरका अङ्ग मात्र फेला परेको जिल्ला प्रहरी कार्यालय चितवनले जनाएको छ।
जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलका अनुसार नदी किनार तथा आसपासका क्षेत्रमा भेटिएका शवलाई भरतपुर अस्पतालको शवगृहमा राखिएको छ। बाढीका कारण ठूलो संख्यामा शव फेला पर्न थालेपछि शव पहिचान तथा व्यवस्थापनमा समेत चुनौती देखिएको छ।
प्रहरीका अनुसार तनहुँमा फेला परेका नौ शवसमेत चितवन पठाइएको थियो। तर भरतपुर अस्पतालको शवगृहमा पर्याप्त ठाउँ नभएपछि ती शवलाई पुनः तनहुँ नै फिर्ता पठाइएको पौडेलले जानकारी दिए।
बाढीपछि चितवन जिल्लामा रहेका तीनवटै सुरक्षा निकायले नदी किनारमा खोजी तथा उद्धार अभियान सञ्चालन गरिरहेका छन्। त्रिशूली र नारायणी नदीका विभिन्न क्षेत्रमा सम्भावित शव तथा मानव शरीरका अङ्गको खोजी भइरहेको प्रहरीले जनाएको छ।
भरतपुर अस्पतालको शवगृहमा थप शव राख्ने ठाउँको अभाव भएपछि अब फेला पर्ने शवलाई औद्योगिक प्रतिष्ठानका कार्यालय तथा उपलब्ध अन्य सुरक्षित स्थानमा व्यवस्थापन गर्ने तयारी भइरहेको प्रहरी प्रमुख पौडेलले बताए।
बाढीका कारण नदीको बहाव तीव्र रहेकाले खोजी तथा उद्धार कार्यमा समेत जोखिम रहेको सुरक्षा निकायले जनाएको छ। फेला परेका शवको पहिचान, अभिलेखीकरण तथा सम्बन्धित परिवारसँग समन्वय गर्ने काम पनि सँगसँगै अघि बढाइने बताइएको छ।
