काठमाडौं । नेपालमा बुधबार आएको विनाशकारी बाढीबाट प्रभावित नागरिकको सहयोगका लागि भारत सरकारले १० टन मानवीय सामग्री उपलब्ध गराएको छ।
नेपालमा आएको प्राकृतिक विपद्का कारण ठूलो जनधनको क्षति भएपछि छिमेकी राष्ट्र भारतले संकटको समयमा ऐक्यबद्धता जनाउँदै राहत सामग्री नेपाललाई हस्तान्तरण गरेको हो। नेपालस्थित भारतीय दूतावासका अनुसार उपलब्ध गराइएको सहायता बाढी प्रभावित क्षेत्रमा तत्काल आवश्यक पर्ने राहत तथा मानवीय सहयोगमा प्रयोग गरिनेछ।
नेपालका लागि भारतीय राजदूत नवीन श्रीवास्तवले बुधबार राति नै संस्कृति, पर्यटन तथा नागरिक उड्डयन मन्त्री खडक राज पौडेललाई उक्त राहत सामग्री हस्तान्तरण गरेका हुन्। राहत सामग्री हस्तान्तरण गर्दै भारतीय पक्षले विपद्को यस कठिन घडीमा नेपालसँग सहकार्य र सहयोग जारी राख्ने प्रतिबद्धता जनाएको छ।
भारतको विदेश मन्त्रालयले उपलब्ध गराइएको मानवीय सहायताले बाढी प्रभावित क्षेत्रमा सञ्चालन भइरहेका राहत, खोजी तथा उद्धार र पुनःस्थापनाका प्रयासमा सहयोग पुग्ने विश्वास व्यक्त गरेको छ।
सहायता सामग्री हस्तान्तरणका क्रममा भारतीय पक्षले नेपाललाई आवश्यक पर्ने हरेक प्रकारको सहयोग उपलब्ध गराउन भारत सदैव प्रतिबद्ध रहेको जनाएको छ। साथै, प्राकृतिक विपद् वा अन्य संकटका समयमा भारत सधैं नेपालको साथमा उभिने प्रतिबद्धता पनि दोहोर्याएको छ।
