काठमाडौं। रसुवा र नुवाकोटमा थप ठूलो बाढी आउन लागेको भन्दै सामाजिक सञ्जाल तथा विभिन्न माध्यममा फैलिएको सूचनामा कुनै आधिकारिकता नभएको जल विज्ञान तथा जलस्रोत अनुसन्धान केन्द्रअन्तर्गतको बाढी पूर्वानुमान महाशाखाले स्पष्ट पारेको छ।
महाशाखाका अनुसार हालसम्म प्राप्त मौसम तथा जलसम्बन्धी सूचना र प्रारम्भिक विश्लेषणबाट थप ठूलो बाढी आउने कुनै विश्वसनीय आधार देखिएको छैन। त्यसैले नागरिकलाई संयमित रहन र अपुष्ट सूचना तथा हल्लाको पछि नलाग्न महाशाखाले आग्रह गरेको छ।
हाल उक्त क्षेत्रमा वर्षा भइरहेकाले नदीको बहाव केही बढ्न सक्ने भए पनि तत्काल थप विनाशकारी बाढी आउने सम्भावना नदेखिएको महाशाखाले जनाएको छ।
नेपालतर्फ ठूलो बाढी प्रवेश गर्ने अवस्था देखिएमा सीमा क्षेत्रमा तैनाथ सुरक्षा निकाय तथा सम्बन्धित निकायसँग समन्वय गरी तत्काल आवश्यक सूचना प्रवाह गरिने महाशाखाले जनाएको छ।
