काठमाडौं । लगातारको वर्षासँगै आएको बाढी र पहिरोका कारण काठमाडौँलाई विभिन्न जिल्लासँग जोड्ने प्रमुख सडकमार्गमा यातायात सेवा प्रभावित भएको छ । नेपाल प्रहरीले बिहीबार बिहान ६ः३५ बजे सार्वजनिक गरेको विवरणअनुसार केही सडकखण्ड पूर्ण रूपमा बन्द भएका छन् भने केही स्थानमा एकतर्फी यातायात सञ्चालन भइरहेको छ ।
काठमाडौँ–धादिङ सडकखण्डअन्तर्गत चन्द्रागिरि नगरपालिका–२, चिसोपानीमा पहिरो खसेपछि सडक एकतर्फी रूपमा सञ्चालन भइरहेको छ । यस्तै, बाढीको जोखिमलाई ध्यानमा राख्दै बीपी राजमार्गको काभ्रे खण्डमा रातिको समयमा १० टनसम्मका मालवाहक सवारीसाधनलाई मात्र सञ्चालन अनुमति दिइएको छ । दिउँसो भने सडकको अवस्था हेरेर मात्र सवारी सञ्चालन गर्न दिइने प्रहरीले जनाएको छ ।
रसुवा जाने त्रिशूली–मैलुङ–स्याफ्रुबेंसी सडकअन्तर्गत उत्तरगया–५, खाल्टेमा बाढीले सडक पूर्ण रूपमा अवरुद्ध पारेको छ । उक्त सडकखण्ड तत्काल सञ्चालनमा आउने सम्भावना नरहेको जनाइएको छ । त्यस्तै, टोखा–छहरे तथा पासाङ ल्हामु राजमार्गमा बाढी र पहिरोको जोखिमका कारण रातिको समयमा सवारी सञ्चालनमा रोक लगाइएको छ । केही स्थानमा भने सडक पूर्ण रूपमा ठप्प रहेको प्रहरीले जनाएको छ ।
यात्रुको बढी चाप रहने पृथ्वी राजमार्गमा समेत पहिरोका कारण यातायात अस्तव्यस्त बनेको छ । धादिङको कृष्णभीरमा पहिरो खसेपछि सडक पूर्ण रूपमा बन्द भएको छ । परेवा भीरमा भने साना सवारीसाधनलाई मात्र एकतर्फी आवागमनको व्यवस्था गरिएको छ । जवाखोला र कमेरेभीरमा पनि पहिरोका कारण सडक एकतर्फी रूपमा मात्र सञ्चालनमा रहेको प्रहरीले जनाएको छ ।
लगातारको वर्षासँगै पहिरो तथा बाढीको जोखिम कायमै रहेकाले प्रहरीले सर्वसाधारणलाई अत्यावश्यकबाहेक यात्रा नगर्न आग्रह गरेको छ । यात्रा गर्नुपर्ने अवस्था भए प्रस्थान गर्नुअघि सम्बन्धित सडकखण्डको पछिल्लो अवस्था बुझेर मात्र यात्रा गर्न प्रहरीले अनुरोध गरेको छ ।
