काठमाडौं। नेपाली बजारमा सुन र चाँदीको मूल्य शुक्रबार घटेको छ। नेपाल सुनचाँदी व्यवसायी महासंघका अनुसार सुनको मूल्य एकै दिन तोलामा ४ हजार ८ सय रुपैयाँले घटेको हो।
शुक्रबार छापावाल सुन प्रतितोला ३ लाख १ हजार रुपैयाँमा कारोबार भइरहेको छ। अघिल्लो दिन बिहीबार सुनको मूल्य ३ लाख ५ हजार ८ सय रुपैयाँ थियो।
यसअघि बिहीबार सुनको भाउ प्रतितोला ३ हजार ४ सय रुपैयाँले बढेको थियो। शुक्रबार भने त्यसको विपरीत उल्लेख्य गिरावट आएको हो।
अन्तर्राष्ट्रिय बजारमा पनि सुनको मूल्य प्रतिऔंस ४ हजार ३३२ अमेरिकी डलर आसपास कारोबार भइरहेको छ।
चाँदीको भाउसमेत शुक्रबार घटेको छ। महासंघका अनुसार चाँदी प्रतितोला ४ हजार ६ सय रुपैयाँमा कारोबार भइरहेको छ।
बिहीबार चाँदीको मूल्य प्रतितोला ४ हजार ८ सय ५५ रुपैयाँ थियो। यस आधारमा शुक्रबार चाँदी तोलामा २ सय ५५ रुपैयाँले सस्तिएको हो।
