काठमाडौँ । बागमती प्रदेश सरकारले प्रदेशअन्तर्गतका कार्यालय तथा निकायको संगठन तथा व्यवस्थापन (ओएनएम) सर्वेक्षणसम्बन्धी खाका स्वीकृत गर्दै हाल कायम दरबन्दीमध्ये १३४ पद घटाउने निर्णय गरेको छ।
बिहीबार बसेको प्रदेश मन्त्रिपरिषद् बैठकले प्रदेशअन्तर्गतका कार्यालयको संख्या १८० कायम गर्ने निर्णय गरेको हो। हाल चार हजार ८१४ दरबन्दी रहेकोमा त्यसलाई घटाएर चार हजार ६८० कायम गर्ने निर्णय गरिएको प्रदेश सरकारले जनाएको छ।
प्रदेश सरकारका प्रवक्ता एवं भौतिक पूर्वाधार विकासमन्त्री भरतबहादुर केसीले मन्त्रिपरिषद् बैठकपछि निर्णय सार्वजनिक गर्दै ओएनएम सर्वेक्षणका लागि आवश्यक खाका स्वीकृत गरिएको जानकारी दिए। उनका अनुसार स्वीकृत खाकाअनुसार प्रदेश सरकारअन्तर्गत १३४ दरबन्दी घट्नेछ।
बैठकले बागमती प्रदेशको समस्याग्रस्त सहकारी व्यवस्थापन समितिका लागि सदस्य सचिवदेखि कार्यालय सहयोगीसम्म २४ जनाको अस्थायी दरबन्दी पनि स्वीकृत गरेको छ। समितिको काम सम्पन्न भएपछि उक्त अस्थायी दरबन्दी स्वतः समाप्त हुने व्यवस्था गरिएको मन्त्री केसीले जानकारी दिए।
त्यस्तै, मन्त्रिपरिषद् बैठकले कृषि, पशुपन्छी, वन तथा वातावरण मन्त्रालयअन्तर्गत प्रदेश वन सेवा केन्द्रका प्रमुख एवं ११औँ तहका कर्मचारी निरञ्जन श्रेष्ठले दिएको राजीनामा स्वीकृत गरेको प्रवक्ता केसीले जानकारी दिए।
