राष्ट्र बैंकले नयाँ विशेषतासहित ५० रुपैयाँको नोट चलनमा ल्यायो

काठमाडौँ । नेपाल राष्ट्र बैंकले परिमार्जित डिजाइन तथा थप सुरक्षा विशेषतासहित ५० रुपैयाँ दरको नयाँ बैंकनोट शुक्रबारदेखि प्रचलनमा ल्याएको छ।

राष्ट्र बैंकको मुद्रा व्यवस्थापन विभागका अनुसार नयाँ नोटको आकार र मूल डिजाइन साविककै रहे पनि विभिन्न विशेषता परिमार्जन गरिएको छ।

नयाँ बैंकनोटमा ‘श्री नेपाल राष्ट्र बैंक, नेपाल सरकारको जमानत प्राप्त’ भन्ने प्रतिज्ञात्मक वाक्यांश राखिएको छ। नोटको अगाडिको भागमा हिमालको चित्रसँगै लालीगुराँसको पानी छाप समावेश गरिएको छ। त्यस्तै, पानी छापको तल्लो भागमा ‘५०’ अंक पनि देखिने गरी व्यवस्था गरिएको राष्ट्र बैंकले जनाएको छ।

नोटको तल्लो भागमा विसं २०८२ को सिरिज नम्बर राखिएको छ भने गभर्नर प्राडा विश्वनाथ पौडेलको दस्तखत रहनेछ। बैंकनोटमा १.२ मिलिमिटर चौडाइको सुरक्षा धागो प्रयोग गरिएको छ, जसमा ‘NRB’ लेखिएको हुन्छ।

नोटको पछाडिको भागमा हिँडिरहेको चितुवाको चित्र राखिएको छ। त्यसको माथिल्लो भागमा ‘NEPAL RASTRA BANK’ उल्लेख गरिएको छ भने तल्लो भागमा ‘RUPEES FIFTY’ र ‘2025 A.D.’ सिरिज नम्बर राखिएको छ।