काठमाडौं । निरन्तरको अविरल वर्षाका कारण विद्युतका पोल ढलेपछि मकवानपुरको हेटौंडा उपमहानगरपालिका–१६ स्थित धरान–चतरा सडकखण्ड पूर्ण रूपमा अवरुद्ध भएको छ । सिर्पाली चोक नजिकै सडक किनारमा रहेका विद्युतका पोलहरू ढलेपछि यातायात आवागमन ठप्प भएको हो ।
जिल्ला प्रहरी कार्यालय मकवानपुरका अनुसार असोज ११ गते बिहान करिब ६ बजे लगातारको वर्षाका कारण जमिन गलेपछि सडक किनारमा रहेका सिमेन्टका १० वटा विद्युतका पोल उक्किएर सडकमा ढलेका थिए । सिर्पाली चोकबाट करिब ५०० मिटरको दूरीमा पोलहरू ढलेपछि सडक पूर्ण रूपमा अवरुद्ध भएको थियो ।
जिल्ला प्रहरी कार्यालय मकवानपुरका प्रवक्ता माधव काफ्लेका अनुसार प्रहरीले नेपाल विद्युत प्राधिकरण हेटौंडासँग समन्वय गरी विद्युत प्राविधिक टोलीको सहयोगमा सडकमा छरिएका तारहरू काटेर हटाएको थियो । तार हटाएपछि सडक खुलाउने प्रक्रिया अघि बढाइएको प्रहरीले जनाएको छ ।
