काठमाडौं । लगातारको वर्षाका कारण देशका विभिन्न स्थानमा पहिरो र बाढीको समस्या देखिएको छ। पहिरो खस्दा प्रमुख सडकखण्ड अवरुद्ध भएका छन् भने नदीमा पानीको बहाव बढेपछि बस्तीहरू डुबानमा परेका छन्।
मुग्लिन–नारायणगढ सडकखण्डअन्तर्गत नाम्सी खोला पुलमाथि लेदो सहितको पहिरो खसेपछि आइतबार बिहानदेखि यातायात अवरुद्ध भएको छ। सडक डिभिजन कार्यालय भरतपुरका अनुसार बिहान ७ः५५ बजे पहिरो खसेपछि सडकमा सवारी आवागमन रोकिएको हो।
मुग्लिन–नारायणगढ सडकखण्डमा पहिरो
पहिरो हटाउन सडक डिभिजनले आवश्यक उपकरण परिचालन गरिसकेको जनाएको छ। कार्यालयका अनुसार पहिरो पन्छाएर सडक सञ्चालनमा ल्याउन करिब दुई घण्टा लाग्ने अनुमान गरिएको छ।
वर्षाका कारण सडकखण्डका अन्य स्थानमा समेत पहिरोको जोखिम रहेकाले यात्रुलाई आवश्यक सावधानी अपनाउन आग्रह गरिएको छ।
बेँसीसहर–चामे सडक पनि अवरुद्ध
लमजुङको बेँसीसहर–चामे सडकखण्ड पनि पहिरोका कारण पूर्ण रूपमा अवरुद्ध भएको छ। बेँसीसहर नगरपालिका–६ स्थित खरखरे भिरमा आइतबार बिहान पहिरो खसेपछि सडकमा यातायात सञ्चालन हुन नसकेको हो।
जिल्ला प्रहरी कार्यालय लमजुङका सूचना अधिकारी ज्ञानेन्द्रबहादुर क्षेत्रीका अनुसार पहिरो खसेको स्थानभन्दा करिब २०० मिटर उत्तरतर्फ सडकसमेत भासिएको छ। लगातार वर्षा भइरहेकाले पहिरो हटाउन र भासिएको सडक मर्मत गर्न कठिनाइ भइरहेको प्रहरीले जनाएको छ।
तालगाउँमा बाढी पस्दा स्थानीय सम्पर्कविहीन
यसैबीच, मर्स्याङ्दी नदीमा आएको बाढीले मनाङको नासों गाउँपालिका–१ स्थित तालगाउँ पुनः डुबानमा परेको छ। केही समयअघि पुनर्निर्माण सम्पन्न भएको गाउँमा फेरि बाढी पसेको हो।
स्थानीय अगुवा राजन गुरुङका अनुसार नदीको बहावमा अवरोध भएपछि पानी गाउँतर्फ पस्दा ताल क्षेत्र जलमग्न बनेको हो। बाढी र पहिरोका कारण गाउँबाट बाहिरिने उत्तर र दक्षिणतर्फका सडक अवरुद्ध भएका छन्।
सडक सम्पर्क टुटेपछि स्थानीय बासिन्दा बाहिरी क्षेत्रसँग सम्पर्कविहीन बनेका छन्। गाउँ चारैतिरबाट घेरिएपछि स्थानीयवासी सामूहिक रूपमा स्वास्थ्य चौकीको भवनमा बसेका छन्।
बाढीका कारण विद्युत् र इन्टरनेट सेवा समेत अवरुद्ध भएको छ। जिल्लाका विभिन्न क्षेत्रमा टेलिफोन सम्पर्क प्रभावित हुँदा तालगाउँभन्दा माथिल्लो क्षेत्रमा बाढी तथा पहिरोको अवस्थाबारे जानकारी लिनसमेत कठिनाइ भएको स्थानीयले बताएका छन्।
२०७८ सालको बाढीबाट ठूलो क्षति पुगेपछि पुनर्निर्माण गरिएको तालगाउँमा पुनः बाढीको जोखिम देखिएको हो। मर्स्याङ्दी नदीमा पानीको बहाव बढिरहेको र नदीको प्राकृतिक बहावमा समेत अवरोध देखिएको भन्दै तल्लो तटीय क्षेत्रका बासिन्दालाई सतर्क रहन आग्रह गरिएको छ।
सम्भावित जोखिमलाई मध्यनजर गर्दै नदी आसपासका बस्तीका बासिन्दालाई सुरक्षित स्थानमा रहन र आवश्यक सावधानी अपनाउनसमेत सचेत गराइएको छ।
Read More
