काठमाडौं । कुलेखानी जलाशयमा पानीको सतह निरन्तर बढिरहेको छ । आज बिहान ५ बजेसम्म जलाशयमा पानीको सतह १ हजार ५२५.११ मिटर मापन गरिएको छ ।
कुलेखानी जलाशयमा अधिकतम १ हजार ५३० मिटरसम्म पानी भण्डारण गर्न सक्ने क्षमता रहेको छ । हाल जलाशयबाट पूर्ण क्षमतामा विद्युत् उत्पादन भइरहेको जनाइएको छ ।
निरन्तर वर्षा भइरहेका कारण पछिल्ला दुई दिनको तुलनामा जलाशयको पानीको सतह केही तीव्र गतिमा बढिरहेको छ । पानीको सतह बढेर १ हजार ५२७ मिटर पुगेपछि पहिलो साइरन बजाइने बताइएको छ ।
त्यसपछि क्रमशः तीन पटक साइरन बज्ने र पानीको सतह १ हजार ५३० मिटर पुगेपछि बाँधको मुख्य ढोका बिस्तारै खोलिने जनाइएको छ ।
