तनहुँका स्थानीय तहलाई चार अर्ब ५६ करोडभन्दा बढी सङ्घीय अनुदान विनियोजन

काठमाडौं । तनहुँ जिल्लाका १० स्थानीय तहले आगामी आर्थिक वर्ष २०८३/८४ का लागि सङ्घीय सरकारबाट कुल रु चार अर्ब ५६ करोड ४७ लाख अनुदान प्राप्त गर्ने भएका छन्। अर्थ मन्त्रालयले सार्वजनिक गरेको विनियोजनअनुसार सबैभन्दा बढी व्यास नगरपालिकाले र सबैभन्दा कम घिरिङ गाउँपालिकाले अनुदान पाएका छन्।

विनियोजनमा समानीकरण, सशर्त, विशेष तथा समपूरक अनुदान समावेश गरिएको छ।

स्थानीय तहगत अनुदान विवरण

अर्थ मन्त्रालयका अनुसार व्यास नगरपालिकाले सबैभन्दा बढी रु ९४ करोड ३० लाख अनुदान पाउनेछ, जसमा समानीकरण, सशर्त र समपूरक अनुदान समावेश छन्। त्यस्तै घिरिङ गाउँपालिका सबैभन्दा कम रु २८ करोड २९ लाख अनुदान पाउने सूचीमा परेको छ।

अनुदान रकम स्थानीय तहको पूर्वाधार विकास, सेवा प्रवाह तथा चालु कार्यक्रम सञ्चालनका लागि विनियोजन गरिएको जनाइएको छ।