काठमाडौँ । नेकपा (एमाले)का महासचिव शंकर पोखरेलले पछिल्लो समय समाजमा पपुलिजम र एनार्किजमको प्रभाव तीव्र रूपमा बढ्दै गएको उल्लेख गर्दै यी दुवै प्रवृत्तिले विचारधारात्मक विकास र दीर्घकालीन राजनीतिक यात्रालाई कमजोर बनाउने बताएका छन्।
नेकपा (एमाले) प्रचार तथा प्रकाशन विभागका प्रमुख निरज आचार्यलाई पद हस्तान्तरण गर्ने कार्यक्रममा बोल्दै पोखरेलले वर्तमान सामाजिक तथा राजनीतिक परिवेशमा लोकप्रियतामुखी र अराजकतावादी सोचको प्रभाव देखिएको बताए। उनका अनुसार यस्ता प्रवृत्तिहरूले समाजलाई तत्काल देखिने मुद्दामा मात्र केन्द्रित गराएर दीर्घकालीन दृष्टिकोण र वैचारिक बहसलाई ओझेलमा पार्ने काम गर्छन्।
“आज समाजमा पपुलिजम र एनार्किजमको प्रभाव उल्लेखनीय रूपमा देखिन्छ। यी दुवै प्रवृत्तिले विचारधारात्मक विकासलाई सहयोग गर्दैनन्, बरु भविष्यमुखी सोचलाई निरुत्साहित गर्छन्,” पोखरेलले भने।
उनले पपुलिजम र एनार्किजमलाई यथास्थितिको पक्षपोषक प्रवृत्तिका रूपमा चित्रित गर्दै यिनले समाजलाई तत्कालीन समस्याको समाधानका रूपमा आफूलाई प्रस्तुत गरे पनि वास्तविक परिवर्तनको मार्ग प्रशस्त गर्न नसक्ने दाबी गरे। उनका अनुसार यस्ता धारहरूले जनमानसमा भ्रम सिर्जना गर्दै सबै समस्याको समाधान आफैंसँग रहेको सन्देश प्रवाह गर्ने प्रयास गर्छन्।
महासचिव पोखरेलले हालको राजनीतिक बहसमा ‘पुराना शक्तिले केही गर्न सक्दैनन्, नयाँलाई अवसर दिनुपर्छ’ भन्ने भाष्य निर्माण भइरहेको उल्लेख गर्दै त्यसप्रति पनि टिप्पणी गरे।
उनले वैकल्पिक राजनीतिक अभ्यास केवल प्रविधि र प्रविधिमैत्री संरचनाको आधारमा दीर्घकालसम्म टिक्न नसक्ने तर्क गर्दै राजनीतिक आन्दोलन र परिवर्तनका लागि स्पष्ट विचारधारात्मक आधार अपरिहार्य रहेको बताए।
“वैकल्पिक राजनीति प्रविधिको जगमा विकसित भएको देखिन्छ। तर त्यो दीर्घकालीन रूपमा टिकाउ हुन्छ कि हुँदैन भन्ने प्रश्न बाँकी छ। अन्ततः समाज विचारधारामै फर्किनुपर्ने अवस्था आउँछ, र समाजलाई त्यतैतर्फ उन्मुख गराउन आवश्यक छ,” उनले भने।
