काठमाडौं । काठमाडौं उपत्यकामा पछिल्लो २४ घण्टाको अवधिमा ट्राफिक नियम उल्लङ्घन गर्ने २ हजार २ सय ९९ सवारी चालकलाई कारबाही गरिएको छ। यस कारबाहीबाट राज्यकोषमा करिब रु २१ लाख ८६ हजार ५०३ राजस्व संकलन भएको काठमाडौं उपत्यका ट्राफिक प्रहरी कार्यालयले जनाएको छ।
कार्यालयका अनुसार मादक पदार्थ सेवन (मापसे) गरेर सवारी चलाउने ९५ जना चालक कारबाहीमा परेका छन्। त्यस्तै, नियमविपरीत राइड सेयरिङ सेवा सञ्चालन गर्ने ९९ जनामाथि पनि कारबाही गरिएको छ।
ट्राफिक नियमअनुसार संकेत बत्ती उल्लङ्घन गर्ने १२९ जना तथा तीव्र गतिमा सवारी चलाउने १४७ चालकलाई समेत कारबाही गरिएको प्रवक्ता प्रहरी उपरीक्षक नरेशराज सुवेदीले जानकारी दिएका छन्।
यसैगरी लेन अनुशासन पालना नगर्ने १०८ जना, निषेधित क्षेत्रमा हर्न बजाउने ११५ जना, सडक पेटीमा सवारी पार्किङ गर्ने ८७ जना र एकतर्फी सडकमा गलत दिशामा सवारी चलाउने ९८ जनालाई पनि कारबाही गरिएको कार्यालयले जनाएको छ।
अन्य विभिन्न ट्राफिक नियम उल्लङ्घन गर्ने सबैभन्दा बढी १ हजार ४२१ चालकलाई समेत कानुनी दायरामा ल्याइएको प्रहरीले स्पष्ट पारेको छ।
