काठमाडौं । चेक अनादर तथा ठगीसम्बन्धी आरोपमा पक्राउ परेका सेफ सन्तोष साह हाजिरी जमानीमा रिहा भएका छन्।
काठमाडौंमा रेष्टुरेन्ट खरिदसँग सम्बन्धित कारोबारका क्रममा चेक अनादर तथा ठगीको आरोप लागेपछि उनलाई शनिबार प्रहरीले पक्राउ गरेको थियो। अनुसन्धान प्रक्रिया अघि बढिरहेकै अवस्थामा उनी आइतबार हाजिरी जमानीमा छाडिएका हुन्।
काठमाडौं जिल्ला प्रहरी कार्यालयका प्रवक्ता प्रहरी उपरीक्षक पवनकुमार भट्टराईका अनुसार अनुसन्धानका क्रममा आवश्यक परे उपस्थित हुने शर्तसहित परिवारको जिम्मा लगाउँदै साहलाई हाजिरी जमानीमा रिहा गरिएको हो। अनुसन्धान जारी रहेको प्रहरीले जनाएको छ।
