काठमाडौं। चीनको औपचारिक चारदिने भ्रमणमा रहेका नेपालका परराष्ट्रमन्त्री शिशिर खनाल र चिनियाँ जनराजनीतिक परामर्श सम्मेलन (सीपीपीसीसी) राष्ट्रिय समितिका अध्यक्ष वाङ हुनिङ बीच बेइजिङमा औपचारिक भेटवार्ता भएको छ।
मंगलबार बिहान भएको उक्त छलफलमा नेपाल–चीन सम्बन्धका विभिन्न पक्षहरूबारे विस्तृत विचारविमर्श भएको बेइजिङस्थित नेपाली दूतावासले जनाएको छ। वार्तामा विशेषगरी विकास सहकार्य, व्यापार विस्तार, लगानी प्रवर्द्धन, पर्यटन, राजनीतिक आदान–प्रदान तथा जनस्तरको सम्बन्धलाई अझ सुदृढ बनाउने विषयमा केन्द्रित छलफल भएको थियो।
भेटका क्रममा मन्त्री शिशिर खनाल ले नेपाल–चीनबीचको दीर्घकालीन मित्रता र सहकार्यलाई अझ मजबुत बनाउन चिनियाँ पक्षको निरन्तर प्रतिबद्धताको प्रशंसा गरेका थिए। उनले दुई देशबीचको परम्परागत सम्बन्ध आगामी दिनमा अझ सशक्त र गतिशील हुने विश्वास व्यक्त गरे।
भ्रमण कार्यक्रमअनुसार मन्त्री खनालले आज बेइजिङस्थित ‘ह्वाइट पागोडा’ को अवलोकन गर्नेछन्। त्यसपछि उनले चिनियाँ तथा अन्तर्राष्ट्रिय सञ्चारमाध्यम रोयटर्ससहितलाई अन्तर्वार्ता दिने कार्यक्रम रहेको छ। अपराह्न उनी बेइजिङस्थित नेपाली दूतावासद्वारा आयोजित लगानी सम्मेलनमा सहभागी हुनेछन्।
मन्त्री शिशिर खनाल चीनका विदेशमन्त्री तथा चिनियाँ कम्युनिष्ट पार्टी केन्द्रीय समितिका राजनीतिक ब्यूरो सदस्य वाङ यी को निमन्त्रणामा आइतबार बेइजिङ पुगेका हुन्। यसअघि सोमबार दुई देशका प्रतिनिधिमण्डलबीच औपचारिक वार्ता सम्पन्न भइसकेको थियो।
भ्रमण सम्पन्न गरी मन्त्री खनाल भोलि स्वदेश फर्किने कार्यक्रम रहेको छ।
