काठमाडौँ । अमेरिकाको दक्षिणी क्यालिफोर्नियास्थित एडवाड्र्स एयर फोर्स बेसमा नियमित परीक्षण उडानका क्रममा अमेरिकी वायुसेनाको बी–५२ बमवर्षक विमान दुर्घटनाग्रस्त हुँदा आठ जनाको मृत्यु भएको छ। मृतकमध्ये बोइङ कम्पनीका दुई कर्मचारी पनि रहेका छन्।
स्थानीय समयअनुसार सोमबार बिहान ११:२० बजे विमान उडान भरेको केही समयमै दुर्घटनामा परेको अमेरिकी सञ्चारमाध्यमहरूले जनाएका छन्। दुर्घटनापछि विमानमा आगलागी हुँदा आकाशमा बाक्लो कालो धुवाँ फैलिएको थियो, जुन टाढासम्म देखिएको बताइएको छ।
एडवाड्र्स एयर फोर्स बेसका कर्नेल जेम्स हेय्सका अनुसार दुर्घटनामा सेना, सरकारी निकाय तथा सरकारी ठेकेदारसँग आबद्ध आठ जनाले ज्यान गुमाएका छन्। उनले घटनालाई अमेरिकी वायुसेना समुदायका लागि ठूलो क्षति भएको बताएका छन्।
अधिकारीहरूका अनुसार विमान एयर बेसभित्रकै रनवे क्षेत्रमा उडान भरेलगत्तै दुर्घटनामा परेको थियो। प्रारम्भिक मूल्याङ्कनले विमानमा सवार कसैको पनि जीवित उद्धार सम्भव नभएको देखाएको छ। मृतकका परिवारलाई औपचारिक जानकारी दिने प्रक्रिया जारी रहेकाले उनीहरूको नाम तत्काल सार्वजनिक नगरिएको जनाइएको छ।
दुर्घटनाग्रस्त बी–५२ विमान एयर बेसको रडार आधुनिकीकरण कार्यक्रमसँग सम्बन्धित परीक्षण कार्यमा संलग्न रहेको बताइएको छ। घटनापछि सार्वजनिक भएका प्रारम्भिक भिडियो तथा हवाई दृश्यहरूले दुर्घटनाको प्रभाव निकै गम्भीर रहेको संकेत गरेका छन्।
दुर्घटनाको कारणबारे अनुसन्धान जारी छ। प्रारम्भिक अनुसन्धान प्रतिवेदन तयार हुन करिब ३० दिन लाग्न सक्ने अनुमान गरिएको छ भने विस्तृत प्राविधिक विश्लेषण सम्पन्न गर्न छ महिनाभन्दा बढी समय लाग्न सक्ने अधिकारीहरूले बताएका छन्।
बोइङ कम्पनीले आफ्ना दुई कर्मचारी विमानमा सवार रहेको पुष्टि गर्दै प्रभावित परिवारसँग सम्पर्कमा रहेको जनाएको छ। यस्तै, क्यालिफोर्नियाका गभर्नर गेभिन न्युसमले घटनाप्रति दुःख व्यक्त गर्दै मृतकका परिवार तथा एडवाड्र्स एयर फोर्स बेस समुदायप्रति समवेदना प्रकट गरेका छन्।
दुर्घटनास्थलबाट प्राप्त हवाई दृश्यहरूमा आसपासका क्षेत्र जलेको र केही स्थानबाट अझै धुवाँ निस्किरहेको देखिएको छ। अनुसन्धान अधिकारीहरूले दुर्घटनाको वास्तविक कारण पत्ता लगाउन प्राविधिक तथा सुरक्षा पक्षको विस्तृत अध्ययन गरिरहेका छन्।
